Endigi ýaqytta elimizde jol salatyn jáne jóndeitin merdiger kompaniialardyń reitingi ázirlenedi. Bul týraly «QazAvtoJol» ulttyq kompaniiasynyń basqarma tóraǵasy Ulan Álipov málim etti, dep habarlaidy QazAqparat.
«Biz biyldan bastap elimiz boiynsha jol salatyn jáne jóndeitin merdiger kompaniialardyń reitingisin jasamaqpyz. Búginde reiting júrgizýdiń talap-erejeleri ázirlenip, bekitildi. Sondai-aq, barlyq merdiger kompaniialar habardar etildi. Endigi ýaqytta jol jóndep jatqan merdiger kompaniianyń jumysyn arnaiy qurylǵan komissiia qadaǵalap, oǵan baǵa beredi. Reiting arnaiy eseptelgen baldyq júiemen júrgiziledi. Eger kompaniia jumysynan aqaý tabylsa, demek baly kemidi degen sóz», - dedi U. Álipov.
Onyń aitýynsha, merdiger kompaniialardyń reitingi bolashaqta memlekettik satyp alý júiesine engizilmek.
«Óz jumysyn tiianaqty, kemshiliksiz atqarǵan kompaniialar memlekettik satyp alý júiesinde aldyńǵy orynda turady. Jáne olarǵa belgili bir jeńildikterde qarastyrylatyn bolady. Al kerisinshe jumysy aqsaǵan jol jóndeý kompaniialardy qajet jaǵdaida memlekettik satyp alý protsesine qatystyrmaý sharalarynda qarastyrmaqpyz. Árine munyń barlyǵyn arnaiy komissiia sheshedi. Onyń quramynda jol salasy mamandarynan bólek, táýelsiz sarapshylar, monitoring mamandary jáne qoǵam belsendileri bolady», - dedi ol.
Buǵan deiin atalǵan kompaniia basshysy «Qaraǵandy - Balqash» tasjolynyń qashan paidalanýǵa beriletinin habarlaǵan bolatyn.
