Qazaqstannyń eńbek naryǵynda jol jóndeý jumysshylarynyń tapshylyǵy baiqalady, dep habarlaidy Eńbek jáne halyqty áleýmettik qorǵaý ministrligi.
Ministrliktiń habarlaýynsha, elektrondy eńbek birjasynda (EEB) jariialanǵan 12 myńnan astam bos jumys ornyna 3 myń túiindeme ornalastyrylǵan. Eń kóp suranysqa ie bilikti mamandyqtar «bestigine» tas qalaýshy (1912 bos oryn), betonshylar (1861), kúzetshiler (1816) jáne medbikeler (meiirgerler) (1637) engen.
«Mundai qorytyndyǵa 2020 jyldyń II toqsanyndaǵy «Qazaqstandaǵy bilikti eńbekke degen usynys pen suranysty taldaý» zertteýiniń nátijeleri boiynsha WDC (Ministrliktiń janyndaǵy Eńbek resýrstaryn damytý ortalyǵy) taldaýshylary keldi. Joǵaryda kórsetilgen kezeńde bilikti jumyskerler úshin EEB-da barlyǵy 163 myń bos jumys orny ornalastyryldy. Al bilikti mamandar túiindemeleriniń sany 106 myńdy qurady», - dep habarlaidy Eńbek jáne halyqty áleýmettik qorǵaý ministrliginen.
Osy jyldyń II toqsanynda bilikti jumysshylarǵa degen qajettilik ásirese Almaty qalasynda (22,5 myń), Qaraǵandy oblysynda (17,4 myń), Qostanai oblysynda (16,4 myń) jáne Nur-Sultan qalasynda (16 myń) baiqalǵan.
«Sáýir aiynda ai saiynǵy dinamikada jyl basynan beri bos jumys oryndarynyń eń az sany, iaǵni 25 myńnan sál artyq jumys orny ornalastyrylǵan. Biraq mamyr aiynda karantin rejiminiń birtindep álsireýi jáne jumyspen qamtý baǵdarlamasyn júzege asyrý aiasynda bos jumys oryndarynyń sany 2,8 esege ósti», – deidi WDC boljaý departamentiniń direktory Dmitrii Shýmekov.
Sarapshylardyń aitýynsha, bilikti eńbekke qatysty ornalastyrylǵan bos jumys oryndarynyń jartysynan kóbi eki kásibi topqa: kásipqoilar men ónerkásip, qurylys, kólik jáne basqa da uqsas salalardyń jumysshylaryna baǵyttalǵan.
