QR IIM Ákimshilik politsiia komitetiniń bólim bastyǵy Nurseiit Ábishev Ákimshilik quqyqbuzýshylyq týraly kodekske engizilgen ózgeristerge sáikes, qandai aiyppuldardyń mólsheri azaiǵanyn atady, dep habarlaidy "Ult aqparat".
«2017 jyly 28 jeltoqsanda Elbasy Qazaqstan Respýblikasynyń ákimshilik quqyqbuzýshylyq týraly kodeksine ózgerister engizý týraly zańyna qol qoidy. Zań resmi túrde jariialanǵan kúnnen bastap, 10 kúnnen keiin kúshine enedi. Ákimshilik quqyqbuzýshylyq kodeksine engizilgen erejelerge sáikes, jol erejeleriniń buzylýyna qatysty aiyppuldyń 22 túri azaityldy», - deidi Nurseiit Ábishev Astanada ótken baspasóz máslihaty barysynda.
QR IIM ókiliniń aitýyna qaraǵanda, belgili bir shekti jyldamdyqty 10-nan 20 shaqyrymǵa asyrǵan jaǵdaida aiyppul mólsheri qazir 10 AEK bolsa, budan bylai 5 AEK-ke azaiady.
«Sonymen qatar, múgedekterdiń kólikterin qoiýǵa arnalǵan orynǵa basqa júrgizýshiler kólikterin qoiǵan jaǵdaida qazirgi aiyppul 50 AEK bolsa, onyń mólsheri zańǵa engizilgen ózgeristerge sáikes 10%-ǵa azaiady. Sonymen qatar, Ishki ister organdary toqtaý týraly belgi bergende, jol saqshysynyń zańdy talabyna baǵynbaǵan jaǵdaida júrgizýshilerge qazirgi kezde 1 jylǵa deiin kólik quraldaryn basqarý quqyǵyn aiyrylady. Al atalǵan zańmen osy jazany 6 aiǵa deiin qysqartý kózdelgen», - deidi ol.
Nurseiit Ábishev sonymen birge, joldyń qarsy betine shyǵyp ketken jaǵdaida qazirgi kezde ákimshilik quqyqbuzýshylyq týraly kodeks boiynsha 1 jylǵa deiin júrgizýshi kýáligi men kólikti basqarý quqyǵynan aiyrý jazasy qarastyrylǵan. Al jańa ózgeris boiynsha atalǵan jazany 30 AEK mólsherindegi aiyppulǵa aýystyrý kútilip otyr.
«Atalǵan zań boiynsha aiyppul 7 kúnniń ishinde tólense, 50%-dyq jeńildik jasaý múmkindigi burynǵydai qaldyryldy», - deidi Nurseiit Ábishev.
