Qazaqstanda joǵary nemese arnaiy bilimsiz 1,7 millionǵa jýyq adam jumys isteidi, dep habarlaidy "Ult aqparat" Eńbek resýrstaryn damytý ortalyǵyna silteme jasap.
Eńbek resýrstaryn damytý ortalyǵynyń sarapshylary QR Ulttyq ekonomika ministrligi Statistika komitetiniń derekteri negizinde demografiia men eńbek naryǵyna taldaý jasady. Nátijesinde, 2019 jylǵy 3-shi toqsanda Qazaqstanda resmi jumyspen qamtylǵan, iaǵni resmi ekonomikada tirkelgen, 3,35 million adam joǵary bilimdi jáne 3,74 million adam arnaiy bilimi bar adamdar, al 1,68 million jumyskerdiń tek orta bilimi ǵana bar.
Taldaýǵa sáikes, respýblikada turatyn 18,5 million adamnyń ishinde 9,2 million adam jumys kúshi sanatyna jatady, al is júzinde 8,7 million adam jumys isteidi, onyń 6,7 milliony - jaldamaly jumysshylar.
«Halyqtyń basym bóligi saýda, aýyl sharýashylyǵy, bilim berý salalarynda jáne ónerkásiptiń barlyq túrlerinde – 4,8 mln-nan astam adam jumys isteidi. Suranysy az jumystar – sýmen qamtamasyz etý jáne qaldyqtardy joiý, elektrmen jáne energiiamen qamtamasyz etý, óner jáne oiyn-saýyq salasy, sondai-aq jyljymaityn múlikpen jasalatyn operatsiialar bolyp tabylady. Bul salalardaǵy qyzmetkerlerdiń jalpy sany shamamen 530 myń adamdy quraidy», – deidi ERDO Eńbek resýrstaryn boljaý departamentiniń direktory Dmitrii Shýmekov.
Bul rette aýyl sharýashylyǵy baǵytynda jumys isteitin halyqtyń jartysynan astamy (733 myń) jáne saýdamen ainalysatyn adamdardyń úshten bir bóligi (686 myń) – ózin-ózi jumyspen qamtyǵandar. Sondai-aq, aýyl sharýashylyǵymen ainalysatyn 600 myńǵa jýyq adamnyń tek orta bilimi bar.
Jalpy alǵanda, jumyspen qamtylǵandardyń ishinde arnaiy bilimi joq – 1,68 mln. adam bar. 3,74 million adam orta kásiptik bilimge ie, al qyzmetkerlerdiń úshten bir bóligi – 3,35 million adam joǵary bilimin maqtanysh tuta alady.
«Aita keterligi, jumyspen qamtylǵandardyń jartysynan kóbi, 5,7 mln nemese 65% óz mamandyǵy boiynsha jumys isteidi, mamandyǵyna sai emes emes – 20% jáne 1,3 mln. 15% arnaiy bilim almaǵan», – dep atap ótti Dmitrii Shýmekov.
Mamandyq boiynsha jumystyń bolmaýy da jumyssyzdyq deńgeiine de áser etti. 442 myń jumyssyzdyń 133 myńy (30%) joǵary, al 196 myńy (44%) orta kásiptik bilimi bar.
