Búgin QR Premer-Ministri Asqar Maminniń tóraǵalyǵymen ótken Úkimet otyrysy aiasynda biylǵy qańtar–mamyr aralyǵyndaǵy Qazaqstan Respýblikasynyń áleýmettik-ekonomikalyq damýynyń jáne respýblikalyq biýdjettiń oryndalýynyń qorytyndylary qaraldy, dep habarlaidy "Ult aqparat" primeminister.kz portalyna silteme jasap.
QR ulttyq ekonomika ministri R. Dálenov biylǵy qańtar–mamyr aralyǵynda JIÓ oń qarqyny saqtalǵanyn — ósim 4% quraǵanyn aitty.
«Investitsiialardyń dinamikasy JIÓ ósim qarqynynan joǵary. Osy jyldyń 4 aiyndaǵy 6,7%-ǵa qaraǵanda, ósim 7,8%-ǵa deiin artty. Aýyl sharýashylyǵynda jáne qurylys salasynda investitsiialar bir jarym ese ósti. Ónerkásipte investitsiialar 17,5% -ǵa ósti», — dedi R. Dálenov.
Ónerkásiptik óndiris biylǵy qańtar–mamyr ailarynda 2%-ǵa artqan. Qurylys salasynda jedeldeý baiqalady. 5 aidyń ishinde ósim 8,8% jetken. Ónerkásiptik obektilerdi, avtokólik joldaryn, gaz qubyrlaryn salý jumystary, sondai-aq iri zaýyttardaǵy qurylys-montaj jumystary ulǵaiǵan.
Aýyl sharýashylyǵynda da turaqty ósim baiqalady. Óndiris kólemi 3,7% artqan.
"Qyzmet kórsetý salasynda jedeldeý baiqalady. Esepti kezeńde bul sala qańtar-sáýir ailaryndaǵy 4,2%-ǵa qaraǵanda 4,7%-ǵa ósti. Atalǵan sektordyń barlyq salalarynda dinamikanyń jedeldegeni baiqalady. Qyzmetter segmentinde saýda eń joǵary ósimdi kórsetedi. Satylymdar kólemi 5 aida 7,5%-ǵa ósti. Bul negizinen avtokólik quraldaryn, avtobólshekterdi jáne munai ónimderin satý kóleminiń artýymen bailanysty. Kólik salasynda 5,3%-ǵa deiin jedeldeý belgilengen", - dedi ministr.
QR Ulttyq bankiniń tóraǵasy E. Dosaev osy jyldyń mamyr aiyndaǵy ailyq infliatsiianyń 0,6% quraǵanyn atap ótti. Infliatsiia jyldyq kórsetkishte — 5,3%. Ulttyq banktiń boljamdaryna sáikes, infliatsiia 2019–2020 jyldarǵa belgilengen 4-6% naqtylanǵan maqsatty dáliz sheginde saqtalady. Teńgeniń aiyrbas baǵamy 2018 jyldyń sońyndaǵy deńgeide saqtaldy.
