Ata-ana qamqorlyǵynsyz qalǵan 4,5 myń bala óz úiine oraldy. Bul týraly búgin QR BǴM Balalar quqyǵyn qorǵaý komitetiniń tóraǵasy Nurbek Oishybekov aitty, dep habarlaidy "Ult aqparat".
«Zaman talabyna sai elimizde jyl saiyn balalardyń quqyqtaryn jáne olardyń múddelerin qorǵaityn zańnamalyq qujattarǵa ózgerister men tolyqtyrýlar qabyldanýda. 2017 jyly da sondai ózgerister qabyldandy. Atap aitsaq, halyqaralyq tájiribege súienip, qabyldaýshy jáne qonaq otbasy túsinikteri engizildi. Jetim jáne ata-anasynyń qamqorlyǵynsyz qalǵan balalardyń respýblikalyq bank derekteri, túsinikteri jáne jumys isteý ustanymdary zańnamalyq aktilerge engizilip, búgingi kúni júzege asyrylýda», - dedi N. Oishybekov QR Bilim jáne ǵylym ministri Erlan Saǵadievtiń halyqpen eseptik kezdesýi barysynda.
Onyń atap ótýinshe, otbasylyq qurylymnyń mundai barlyq formasyna memleket tarapynan materialdyq kepildik beriledi. Sonyń nátijesinde sońǵy jyldary balalar úiinde tárbielenýshilerdiń, balalar úileriniń qatary azaiyp keledi.
«Sońǵy 5 jylda jetim balalarǵa arnalǵan uiymdardaǵy balalardyń sany 40 paiyzǵa, 10 myńnan 6 myńǵa deiin qysqardy. Buǵan qosa, 4,5 myń bala týǵan otbasyna oraldy. Osynyń arqasynda elimizde ata-anasynyń qamqorlyǵynsyz qalǵan balalar men jetimderge arnalǵan 50 mekeme taratylyp, jabyldy», - dedi Nurbek Oishybekov.
Komitet basshysynyń dereginshe, elimizde 5 mln 600 myńnan astam bala bar. onyń 3 millonnan astam mektep jasynda, bolsa, 2 millionnan astamy mektepke deiingi jastaǵy sábiler.
