Qazaqstanda jeti jańa saiasi partiia tirkeýge tura almady. Bul týraly Májilistiń jalpy otyrysynda QR Ádilet vitse-ministri Natalia Pan málim etti, dep habarlaidy "Ult aqparat".
«Ókiletti organ retinde Ádilet ministrligi saiasi partiialardyń memleket tirkeýiniń statistikasyn júrgizedi. Osy oraida 2017-2018 jyldarmen salystyrǵanda, 2019 jylda saiasi belsendiliktiń joǵarylaǵany baiqaldy. Búginde tirkelmegen 7 uiym bar», - dedi Natalia Pan.
Osy oraida ol atalǵan saiasi partiialar ne sebepti tirkelmegenin atap ótti.
«Tirkeýden bas tartýdyń sebebine toqtalsaq, jeteýdiń beseýi bastamashy toptardyń tizimin usynbaýyna qatysty. Bireýinde uiymdastyrý komiteti qyzmetiniń merzimi ótip ketken, zańda alty ailyq merzim qarastyrylǵan. Bul turǵyda Ádilet ministrligi tirkeýden bas tartýǵa májbúr bolady. Taǵy bir birlestik tekserýden ótip jatyr, iaǵni onyń músheleri shetel azamattary, quqyq qorǵaý organdarynyń qyzmetkerleri, áskeri qyzmetshi, sýdia bolmaýy kerek. Osyndai shekteýler bar. Osy rette jalpy jeti birlestik bar», - dedi Natalia Pan.
