Qazaqstanda jeńildetilgen nesie berýdi keńeitý boiynsha birqatar shara qabyldandy, dep habarlaidy QazAqparat.
«Biznestiń jol kartasy-2025» jáne «Qarapaiym zattar ekonomikasy» baǵdarlamalary boiynsha kásipkerler úshin qaryz qarajatynyń sońǵy quny qazir endi 6%-dy quraidy. «Biznestiń jol kartasy-2025» baǵdarlamasy boiynsha nesie kólemi 7 mlrd teńgege deiin ulǵaityldy. Sýbsidiialaý merzimi 5 jyldy quraidy. «Qarapaiym zattar ekonomikasy» boiynsha nesie somasy shektelmeidi. Al sýbsidiialaý merzimi 10 jyl», - dedi Ulttyq ekonomika ministri Rýslan Dálenov Úkimet otyrysynda.
Onyń aitýynsha kepildik berý quraly jaqsartylǵan. «Biznestiń jol kartasy-2025» baǵdarlamasy boiynsha kepildikter qaryz somasynyń 85%-yn quraýy múmkin. «Qarapaiym zattar ekonomikasy» boiynsha kepildik nesie somasynyń 50%-dy quraidy.
«Biznestiń jol kartasy-2025» baǵdarlamasy aiasynda salalyq shekteýler alynyp tastaldy. Bul shaǵyn jáne orta bizneske qyzmet túrine qaramastan baǵdarlamaǵa qatysýshy bolýǵa jáne jeńildetilgen qarjy alýǵa múmkindik beredi. «Qarapaiym zattar ekonomikasy» baǵdarlamasy boiynsha taýarlar men qyzmetter tizimi aitarlyqtai keńeitildi. Osy baǵdarlama boiynsha nesieleýdiń jalpy kólemi 1 trln teńgege deiin ulǵaidy», - dedi ol.
Rýslan Dálenov sonymen qatar Ulttyq bank shaǵyn jáne orta bizneske, onyń ishinde jeke kásipkerlerge salalyq shekteýsiz jeńildetilgen nesie berý baǵdarlamasyn iske qosqanyn aityp ótti.
«Nesie ainalym qarajatty tolyqtyrýǵa 1 jylǵa 8%-ben beriledi. Bul baǵdarlamaǵa 600 mlrd teńge bólinedi. Jalpy, nesieleýdi ulǵaitý úshin kóptegen shekteýler alyndy. Tetikter jeńildetilip, qarajat kólemi ulǵaityldy», - deidi Ulttyq ekonomika ministri.
