QR Sybailas jemqorlyqqa qarsy is-qimyl agenttiginiń 1-shi departamentiniń asa mańyzdy ister jónindegi tergeýshisi Daniiar Bekaidarov elimizde jemqorlyqtyń órship bara jatqanyn málim etti, dep habarlaidy QazAqparat.
«2017-2019 jyldary jáne 2020 jyldyń alǵashqy bes aiynda sybailas jemqorlyqqa qarsy is-qimyl agenttiginiń qyzmetkerleri para berýge qatysty myńǵa tarta qylmysty tirkedi. Sonymen birge keiingi úsh jyldaǵy dinamika para berýshilerge qatysty faktilerdiń óskenin kórsetip otyr. Máselen bul baǵytta 2017 jyly 255, 2018 jyly 232, 2019 jyly 342 qylmys anyqtalsa, al 2020 jyldyń alǵashqy bes aiynda 172 qylmys tirkelgen. Endi statistikany salystyra berińiz: 2018 jyly para berýshilerge qatysty 232 qylmys tirkelse, bir jyldan keiin bul qylmys sany 342-ge deiin artqan», - dedi Daniiar Bekaidarov agenttiktiń búgingi «Antikor LIVE» aidarynda.
Osy aralyqta Qazaqstanda para bergeni úshin 586 adam sottalypty. Olardyń 154-i bas bostandyǵynan aiyrylsa, 377-i aiyppul arqalaǵan. Taǵy 67 adamnyń bas bostandyǵy shektelgen.
«Biyl para úshin qylmystyq jaýapkershilikke tartylǵan azamattardyń besten biri, iaǵni 20 paiyzy memlekettik qyzmetkerlerdiń ózi. Olar sottalýdan bólek memlekettik qyzmetten bosatylǵan jáne memlekettik qyzmette ómir boiy jumys isteý quqyǵynan airylǵan azamattar. Taldaý jumystary kórsetip otyrǵandai para berýshilerdiń kóbi – jeke kompaniialardyń ókilderi. Olar laýazymdy adamdardy satyp alý arqyly óz kásibin júrgizgisi keledi, memlekettik satyp alý boiynsha atqarylǵan jumysqa qol qoiý úshin osyndai iske barady», - dedi ol.
Daniiar Bekaidarov sózin naqty mysaldarmen shegelei tústi. Onyń aitýynsha, Almatyda JShS ókilderiniń birine qatysty qylmystyq is qozǵalǵan. Ol kelisimge sáikes somanyń bes paiyzyn (33 mln teńge) Qarasai aýdany ákiminiń orynbasaryna bergen. Aqshany jalpy qamqorlyq úshin usynǵan.
«Osyǵan uqsas qylmys boiynsha elordada «Aqjaiyq Elektro» JShS direktory jazalanyp, oǵan 71 040 000 teńge aiyppul salyndy. Ol Almaty aýdany ákiminiń burynǵy orynbasaryna (3 jylǵa bas bostandyǵynan aiyrylǵan) jalpy qamqorlyǵy men oryndalǵan jumys boiynsha jumys aktisine qol qoiyp berýi úshin 5 mln teńge para bergen», - deidi Daniiar Bekaidarov.
