Sybailas jemqorlyqqa qarsy is-qimyl agenttigi elde jemqorlardyń jazasyn óteý merzimin uzartýdy usynbaq, dep habarlaidy QazAqparat.
«Elbasy men Memleket basshysynyń tapsyrmasyna sáikes agenttik múddeli memlekettik organdarmen birlesip, qaǵidattyq sipatta jańa bastamalardy kótergeli otyr. Sondai bastamalardyń biri – jemqorlyq jasaǵan adamnyń jaýapkershiligin kúsheitý máselesi. Biz jemqorlyqtyń aýyr jáne asa aýyr túrimen sottalǵan adamnyń jazasyn óteý merzimin uzartýdy usynamyz», - dedi Sybailas jemqorlyqqa qarsy is-qimyl agenttiginiń ákimshilik-quqyqtyq departamentiniń direktory Aigúl Bazarbaeva onlain rejimde ótken baspasóz máslihatynda.
Departament direktory jemqorlardyń sottalýyna bailanysty BAQ-taǵy maqalalar men jariialanymdarǵa ylǵi monitoring júrgiziletinin aityp ótti.
«Jemqorlyq qylmysymen sottalǵan adamnyń belgili bir ýaqyttan keiin shartty túrde bostandyqqa shyǵýy – qoǵamnyń yzasyn týǵyzatynyn kórsetip otyr. Halyqtyń pikirinshe, biýdjetten milliondap aqsha jymqyrǵan nemese óz laýazymyn asyra paidalanǵan adamǵa jazasyn jeńildetý múmkindigi berilmeýi kerek. Ol tolyǵymen jaza merzimin óteýi tiis», - dedi ol.
