Májilis Qazaqstan úkimeti týraly konstitýtsiialyq zańǵa ózgerister engizý týraly zań jobasyn birinshi oqylymda maquldady, dep habarlaidy Sputnik Qazaqstan.
Memlekettik qyzmet isteri agenttiginiń tóraiymy Anar Jaiylǵanovanyń aitýynsha, zań jobasy prezidenttiń 2020 jyly 1 qyrkúiekte jaýapty hatshylar institýtyn taratý týraly tapsyrmasyn oryndaý maqsatynda ázirlendi.
"Qazirgi ýaqytta jaýapty hatshylardy prezident taǵaiyndaidy jáne olar, tiisinshe, joǵary statýsqa ie. Osy túzetýler qabyldanǵannan keiin olardyń mindetteri apparat basshysyna júkteledi", - dedi Jaiylǵanova májilistiń jalpy otyrysynda.
Apparat basshylaryn ministrler taǵaiyndaidy jáne olar ministrlerge esep beredi.
Osyǵan bailanysty agenttik úkimet týraly konstitýtsiialyq zańnan jaýapty hatshylardyń mártebesi men ókilettikterin retteitin normalardy alyp tastaýdy jáne olardy memlekettik qyzmet týraly zańda apparat basshylaryna bekitýdi usyndy.
Májilis depýtattary zań jobasyn birinshi oqylymda biraýyzdan maquldady.
