Byltyrǵy qazan aiynan beri Qazaqstan aýmaǵynda 112 sheteldik qylmysker ustalǵan, dep habarlaidy QazAqparat.
Ishki ister ministrliginiń aqparat alańynda osyndai málimet aityldy.
«Ishki ister ministrligi úkimettik emes uiymdarmen birlesip, ótken jyldyń qazan aiynan beri azamattyǵy belgisiz adamdardy anyqtaý jáne qujattandyrý boiynsha jumystar júrgizýde. Osyndai aktsiia barysynda 4636 qujatsyz adam anyqtaldy. Qazirgi ýaqytta politsiia qyzmetkerleri 3 408 adamnyń qujattaryn qalpyna keltirip, 1 278 adamǵa qatysty azamattyq rastaý rásimin aiaqtap jatyr. Aita keterlik jait, jyl basynan beri adam saýdasymen bailanysty 103 qylmys tirkeldi», - dedi vedomstvonyń baspasóz ókili Shuǵyla Turlybek.
Onyń málimetinshe, atalǵan 103 qylmystyń 61-i óndirispen aiaqtalyp, sotqa joldanǵan.
«Qazirgi ýaqytta sottar 9 adamǵa qatysty aiyptaý úkimin shyǵardy. Taǵy 42 is tergeý satysynda, 9 adam túrli merzimge sottaldy. Eńbek jáne jynystyq quldyqtan 19 adam qutqaryldy. Budan basqa «Migrant» jáne «Zańsyz immigrant-2» jedel is-sharasy barysynda 14,5 myńnan astam kóshi-qon zańnamasyn buzý jaǵdaiy anyqtaldy», - dedi Shuǵyla Turlybek.
Ministrliktiń deregi boiynsha kúzden beri sheteldikterdiń eńbegin zańsyz paidalanýdyń 3 666 faktisi tirkelgen.
«Qazaqstannyń kóshi-qon zańnamasyn buzǵan 987 sheteldik elden shyǵaryldy. Ózderinde júrgen sheteldikter týraly politsiiaǵa habarlamaǵan 823 jumys berýshi men 5 966 azamat jaýapkershilikke tartyldy. Politsiia operatsiia kezinde izdeýde júrgen 112 qylmyskerdi ustady jáne zańsyz kóshi-qon uiymdastyrýdyń 33 faktisin anyqtady», - dedi IMM baspasóz ókili.
