Qazaqstanda jasóspirim uldarǵa qaraǵanda qyzdar tis tazalaǵyna basa mán beredi. Mundai derekti Ulttyq qoǵamdyq densaýlyq saqtaý ortalyǵynyń bas mamany Shynar Ábdirahmanova aitty, dep habarlaidy QazAqparat.
Onlain rejimde «HBSC ǵalamdyq jáne ulttyq zertteý nátijelerimen tanystyrý» taqyrybynda ótken dóńgelek ústel barysynda ol 2017-2018 jyldary Qazaqstandaǵy mektep oqýshylarynyń óz densaýlyqtaryna qalai qaraityndyǵyna qatysty zertteýlerdiń nátijesin jariia etken bolatyn.
«Kóptegen elderde jasóspirimderdiń úshten ekisi ǵana kúndelikti tisin eki ret tazalaidy. Qyzdar aýyz qýysy tazalyǵy erejesin jii ustanady. Jasóspirimder arasynda tis tazalaý kórsetkishi eń tómen elderdiń qatarynda Qazaqstan da bar. Elimizde balalardyń 49 paiyzy ǵana kúnine 2 ret jáne odan kóp ret tisin tazalaidy. Bizde uldarǵa qaraǵanda qyzdar tisin jii tazalap turady», - dedi sarapshy.
Onyń atap ótýinshe, jahandyq usynymǵa sáikes, balalar kúndelikti 60 minýt qarqyndy dene tárbiesimen ainalysýy tiis. Álemniń kóptegen elderinde bul kórsetkish ne bári 19 paiyzdy quraidy. Al Qazaqstanda kún saiyn belsendi qimyl jasaityn balalar úlesi 33-34 paiyzǵa jetip otyr. Bul eń joǵary kórsetkish sanalady.
«Degenmen, ásirese qyzdar arasynda 15 jasqa qarai dene qimyly belsendiliginiń tómen tendentsiiasy bar. Biz sonymen qatar balalardyń elektrondy qurylǵy ekrany aldynda qansha ýaqyt ótkizetindigin de zerdeledik. Balalardyń 47 paiyzy túrli qurylǵy ekranynyń aldynda 3 jáne odan da kóp saǵat otyrady», - dedi Shynar Ábdirahmanova.
Sonymen qatar onyń deregine sáikes, elimizdegi balalardyń teń jartysyna jýyǵyna mektep unaidy. Bul álemniń búkil elderi ishindegi eń joǵary kórsetish.
«10 mektep oqýshysynyń jeteýi ustazdardyń, al 10 oqýshynyń altaýy synyptastarynyń jan-jaqty qoldaý kórsetetindigin aitady. Bul mektepterimizdiń balalar úshin pozitivti, qolaily orta ekendigin kórsetedi», - dedi sarapshy.
HBSC (Health Behaviour in School-aged Children) zertteý nátijeleri balalar men jasóspirimderdiń densaýlyǵyn jaqsartý úshin kelisilgen saiasi sheshimder men praktikalyq sharalardy talap etetin problemalyq salalardy anyqtaýǵa múmkindik beredi.
