QR Premer-ministri Asqar Maminniń tóraǵalyǵymen QR Úkimetiniń janyndaǵy Joǵarǵy ǵylymi-tehnikalyq komissiia (JǴTK) otyrysy ótti, dep habarlaidy "Ult aqparat" primeminister.kz-ke silteme jasap.
Ǵylymdy damytýdaǵy basymdyqty baǵyttar men 2020-2022 jyldary jas ǵalymdardyń ǵylymi zertteýlerin granttyq qarjylandyrý kólemin bólý týraly Bilim jáne ǵylym ministri A. Aimaǵambetov, atom energetikasy salasyndaǵy tehnologiialyq sipattaǵy qoldanbaly ǵylymi zertteýler týraly Energetika ministri N. Noǵaev baiandady.
2020-2022 jyldary jas ǵalymdardyń ǵylymi zertteýlerin granttyq qarjylandyrýdyń jalpy kólemi 9 mlrd teńge bolady (jyl saiyn 3 mlrd teńgeden).
Qazirgi kezde memlekettik ǵylymi-tehnikalyq jáne ekonomikalyq saraptamalar nátijesi boiynsha ulttyq ǵylymi keńester kelesi 7 basymdyqty baǵyt boiynsha jas ǵalymdardyń 1 013 ótinimin iriktep aldy:
- Energetika jáne mashina jasaý (102); tabiǵi resýrstardy, onyń ishinde sý resýrstaryn, geologiiany, qaita óńdeýdi, jańa materialdar men tehnologiialardy, qaýipsiz buiymdar men konstrýktsiialardy utymdy paidalaný (313); jaratylystaný ǵylymdary salasyndaǵy ǵylymi zertteýler, aqparattyq, telekommýnikatsiialyq jáne ǵaryshtyq tehnologiialar (167);
- agroónerkásiptik keshendi turaqty damytý jáne aýyl sharýashylyǵy ónmderiniń qaýipsizdigi (139); ómir jáne densaýlyq týraly ǵylym (127); «Máńgilik El» ǵylymi negizderi (XXI ǵasyr bilimi, gýmanitarlyq ǵylymdar salasyndaǵy irgeli jáne qoldanbaly zertteýler, 155); ulttyq qaýipsizdik jáne qorǵanys (10).
JǴTK «Jaratylystaný ǵylymdary salasyndaǵy ǵylymi zertteýlerdi» jeke basym baǵyt retinde bólýdi bekitti, bul Qazaqstannyń qazirgi ǵylymi mektepterin odan ári nyǵaitý men damytýǵa, osy saladaǵy ǵalymdardyń jańa býynyn qalyptastyrýǵa yqpal etýge baǵyttalǵan.
