Májilis depýtaty Shavhat Ótemisov elde jańartylatyn energetikany damytý úshin qandai qolaily jaǵdailar jasalatynyn aityp berdi, dep habarlaidy QazAqparat.
«Bul maqsatta usynylyp otyrǵan sharalardyń qatarynda jańartylatyn energiia kózderiniń elektr energiiasyn satyp alýǵa arnalǵan kelisimsharttyń qoldanylý merzimin 15 jyldan 20 jylǵa deiin ulǵaitý kózdelgen. Sondai-aq jańartylatyn energiia kózderiniń elektr energiiasyn satyp alýdy júzege asyrý merzimin 5 jylǵa uzartý usynylady. Ol investorǵa aýktsiondyq saýda-sattyqta neǵurlym tómen tarifterdi usynýǵa jaǵdai jasaidy. Bul óz kezeginde tutynýshylardyń shyǵyndaryn tómendetýge múmkindik beredi», - dedi Shavhat Ótemisov jańartylatyn energiia kózderin paidalanýdy qoldaý jáne elektr energetikasy máseleleri boiynsha zań jobasyn tanystyrý kezinde.
Onyń aitýynsha jańartylatyn energiia kózderi jobalary aldyndaǵy tólemder boiynsha óz mindettemelerin oryndamaý jaǵdaiy kezdesýi múmkin. Mundai jaǵdaida zań jobasynda Úkimet tarapynan qarjy-esep aiyrysý ortalyǵyna kómek kórsetý týraly norma usynylǵan.
