Qazaqstanda jeke kýáliktiń dizainy ózgerdi – qujatta birneshe jańa jolaq paida boldy. Jańa úlgidegi jeke kýálikter qazaqstandyqtarǵa 15 maýsymnan bastap berilip jatyr, dep habarlaidy "Ult aqparat" Polisia.kz saityna silteme jasap.
Vedomstvo aqparaty boiynsha, jańa úlgidegi jeke kýáliktiń bet bóliginde ornalasqan jolaqta adamnyń azamattyǵy men jynysy týraly qosymsha málimetter jazylyp turady. Buryn bul aqparat qujatqa ornatylǵan chipte edi.
"Jeke kýáliktiń jańa dizainyn jasaý úshin biýdjetten shyǵyndalýdyń qajeti joq, oǵan qosa ol azamattardyń jańa qujattardy alý úshin tóleitin memlekettik baj salyǵynyń somasyna áser etpeidi (2024 jyly memlekettik baj somasy – 738,4 teńge). Jaramdylyq merzimi ótpegen jeke kýálikterdiń zańdy kúshi saqtalady", - dedi IIM ókilderi.
Vedomstvo málimetine súiensek, qujattardy bir mezgilde jappai aýystyrýdyń keregi joq. Iaǵni qazaqstandyqtarǵa jańa úlgidegi jeke kýálikterdi mynadai jaǵdaida alýǵa bolady:
- azamat jeke kýálikti aýystyrý týraly ótinish berip, ala alady;
- burynǵy jeke kýáliktiń merzimi ótip ketken jaǵdaida ony aýystyrýǵa ótinish bere alady;
- ózge sebepter boiynsha qoldanystaǵy qujattar jaramsyz bolyp sanalsa, jeke kýálikti aýystyrýǵa ótinish berý kerek.
