Ulystyń Uly kúni Áz-Naýryz meiramynda "Turkistan" telearnasy "Otaý TV" ulttyq spýtniktik jelisi jáne kabeldik jeliler arqyly qalyń kórermenge jol tartty, dep habarlady Túrkistan oblysy ákiminiń baspasóz qyzmeti.
Halyqaralyq "Turkistan" telearnasy túrkitildes memleketterdiń aqparat keńistiginde 3 tilde habar taratady. Sondai-aq, kún saiyn ózekti aqparattar men qyzyqty baǵdarlamalar, telehikaialar men derekti filmder kórermen nazaryna usynylady.
Atap aitqanda, tańǵy aqparattyq-saýyqtyq "Salem" baǵdarlamasy, "Turkistan times" jańalyqtar toptamasy, "Ǵibrat", "Ápsana", "Jan saraiy", "Betperde" sekildi tanymdyq baǵdarlamalar bar.
Sonymen qatar, "Turkistan" telearnasy túrkitildes elder arasyndaǵy aqparat almasý men biregei ortaq media keńistik qalyptastyrýǵa altyn kópir bolady degen jospar bar.
Aitýly kúnde telearnanyń ashylýymen kórermender men arna ujymyn aqparat jáne qoǵamdyq damý ministri Aida Balaeva quttyqtady. Ol jańa zamanaýi media ortalyqta elimizdiń talantty mamandary jumys jasaýǵa shaqyrylǵanyn atap ótti.
"Turkistan" telearnasy kórermenderdi qazaq, túrik jáne orys tilinde baýyrlas túrki halyqtarynyń tarihymen, mádenietimen jáne qazirgi ómirimen tanystyrady dep josparlanýda. Arna ujymy aimaqtaǵy mádeniettiń damýyna, oblystyń jetistikterin tek Qazaqstanda ǵana emes, sonymen qatar shetelderde tanymal etýge oń áser etedi", – dep jazdy Balaeva facebook-tegi paraqshasynda.
Ministr óz jazbasynda munyń bári Qazaqstan Respýblikasynyń Tuńǵysh prezidenti – Elbasy Nursultan Nazarbaevtyń 2018 jyly Túrkistan qalasyn oblys ortalyǵy retinde bekitý týraly tarihi sheshiminiń arqasynda múmkin bolyp otyrǵanyn eske saldy.
"Osy sátten bastap qazaq halqynyń jáne túrki áleminiń rýhani besigi bolyp tabylatyn qala jańa tarihtyń sanaýyn bastady. "Turkistan" telearnasy kórermenderin mazmundy jáne qyzyqty televiziialyq jobalarmen qýanta otyryp, aimaqtyń jańa shejiresin zamanaýi jáne jedel aqparatpen júrgizetinine senimdimin", – dedi ol.
