Parlament Májilisiniń tóraǵasy Nurlan Nyǵmatýlin el aýmaǵynda jańa oiyn aimaqtaryn ashý múmkindigin qoldamady, dep habarlaidy QazAqparat.
Búgin palatanyń jalpy otyrysynda «Qazaqstan Respýblikasynyń keibir zańnamalyq aktilerine oiyn biznesi máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
Osy zań jobasy boiynsha depýtattar kóptegen mańyzdy túzetýler engizdi. Máselen, jumys toby barysynda jańa úsh oiyn aimaǵyn ashý týraly normalar alyp tastaý, oiyn biznesin uiymdastyrýshylarǵa zań jobasynda kózdelgen mindetterdi oryndamaǵany úshin ákimshilik jaýaptylyq belgileý jóninde, sondai-aq jaqyn týystarynyń ótinishi boiynsha sottyń qumar oiyndardy jáne bás tigýdi teris paidalanatyn adamdardy áreket qabileti shekteýli dep tanýǵa qatysty usynystar engizdi.
«Depýtatardyń usynysy boiynsha qosymsha úsh oiyn aimaǵyn ashý týraly normalar alyp tastaldy. Býkmekerlik keńseler men totalizatorlar qazir jumys istep turǵan oiyn aimaqtaryna aýysady», - dedi N. Nyǵmatýlin.
Osy oraida ol býmekerlik keńseler men totalizatorlardy megapolister men oblys ortalyqtarynda jáne qalalarda qaldyrý týraly tujyrymdar negizsiz ekenin atap ótti.
«Meniń oiymsha, osynda memlekettik organdardyń qoldaýymen depýttar belsendi ilgeriletken ustanymdy ekinshi oqylymǵa deiin qoldaý kerek», - dedi Nurlan Nyǵmatýlin.
«Bizde ne bolyp jatyr? Jumystan shyqqan adam úiine jetkenshe joldaǵy onshaqty keńseler arqyly ótedi. Qolyndaǵy aqshany soǵan salyp, úiine tapqan tabysynan aiyrylyp keledi. Eger oinaǵysy kelse, kólikke otyryp, tiisti aimaqta (Býrabai, Qapshaǵai) oinaidy», - dedi Májilis tóraǵasy.
