Búgin 1 qyrkúiek – Bilim kúni. Jańa 2020-2021 oqý jylynda 3,3 mln oqýshy, 466 myń kolledj stýdenti jáne 600 myńnan astam joǵary oqý oryndarynyń stýdenti bilim alady. Sanitar dárigerlerdiń talaptaryna sáikes karantin jaǵdaiynda jańa oqý jyly epidemiologiialyq jaǵdaiǵa bailanysty ártúrli formatta bastalady, dep habarlaidy "Ult aqparat" Bilim jáne ǵylym ministrligine silteme jasap.
Jańa oqý jylynda birinshi synypqa 352 091 oqýshy qabyldandy, onyń shamamen 75% – 6 jasqa tolǵan búldirshinder. Degenmen, ata-analardyń sheshimi boiynsha jyl sońyna deiin alty jasqa tolatyn 11 myńǵa jýyq bala mektep oqýshysy atandy.
Balalardyń jas ereksheligi men ata-analardyń tilegi eskerildi, mektepterde sanitarlyq talaptardy qatań saqtai otyryp, 1-4 synyp oqýshylary úshin kezekshi synyptar jumys istep tur.
Jańa oqý jylynda bastaýysh synyptarda bir millionnan astam bala oqidy, onyń 60% ata-analarynyń nemese zańdy ókilderiniń ótinishi boiynsha mektepterde, kezekshi synyptarda stanitarlyq talaptardy qatań saqtai otyryp oqýdy bastady.
Aita keteiik, elimizde 7 myńnan astam mektep jumys isteidi, onyń 3 myńǵa jýyǵynda 1-11 synyp oqýshylary dástúrli formatta oqýdy bastady. Negizinen, bul - shalǵaidaǵy shaǵyn jinaqtalǵan mektepter, olardyń árqaisysynda 180-nen astam bala bar. Tiisti sheshimdi sanitar dárigerler qabyldady.
Shamamen 2,6 mln oqýshy jańa oqý jylyn qashyqtan oqytý formatynda bastady. Olar otandyq bilim platformalaryn paidalana otyryp, qashyqtan oqidy. «Balapan» jáne «El Arna» respýblikalyq telearnalary pedagogterdiń tilekteri boiynsha qosymsha qural retinde paidalanylatyn telesabaqtardy taratatyn bolady.
Biyl jańartylǵan bilim berý mazmunyna tolyq kóshý aiaqtalǵanyn aita ketken jón.
Búgin elimiz boiynsha jańa 32 mektep ashyldy, jyl sońyna deiin taǵy 77 bilim berý uiymy paidalanýǵa beriledi. Jergilikti atqarýshy organdar oqýshylardy qashyqtan oqytýdy uiymdastyrý úshin olarǵa mektep kompiýterleri men roýterlerdi ýaqytsha paidalanýǵa berdi.
Jańa oqý jylynda mektepterde 10 258 jas maman jumysyn bastady.
