«KEGOC» AQ basqarma tóraǵasy Baqytjan Qajiev jańartylatyn energiia kózderi salasynda (JEK) jańa manevrlik qýattar salýǵa qatysty túsinik berdi, dep habarlaidy QazAqparat.
«Úkimettiń tapsyrmasy boiynsha KEGOC kompaniiasy zańnama talaptaryna sáikes JEK elektr energiiasyn biryńǵai satyp alýshy – «JEK qoldaý jónindegi esep aiyrysý-qarjy ortalyǵy» JShS (QEO) qurdy, ol 2014 jyldan bastap ózine júktelgen barlyq fýnktsiialardy oryndai otyryp, tabysty jumys istep keledi. Ótken ýaqyt ishinde KEGOC pen ortalyqtyń úilesimdi jumysynyń arqasynda JEK-ti qoldaý júiesi óziniń ómirsheńdigin dáleldedi. Atap aitqanda, kompaniia usynǵan jobalaý aýktsiondary 2019 jáne 2020 jylǵy aýktsiondarda da óziniń tiimdiligin rastady, JEK elektr energiiasynyń rekordtyq tómen baǵalary alyndy. Jalpy alǵanda, ortalyqtyń jalpy belgilengen qýaty 2 835 MVt bolatyn 134 RRA shartyn jasasty», - dedi Baqytjan Qajiev Úkimet otyrysynda.
Onyń aitýynsha, 2020 jyldyń qorytyndysy boiynsha QEO arqyly elektr energiiasyn ótkizetin jumys istep turǵan JEK stantsiialarynyń sany jalpy belgilengen qýaty 1 570 MVt bolatyn 72 nysandy qurady.
«Bul rette JEK nysandarynyń elektr energiiasyn óndirýdiń ósýi údemeli qarqynmen júrip jatyr. 2020 jyldyń qorytyndysy boiynsha ekijaqty sharttardy eseptemegende, JEK obektileriniń tek qana QEO arqyly elektr energiiasyn óndirýi 2,5 mlrd kVtsaǵ qurady. Al 2025 jylǵa qarai 8 mlrd kVtsaǵ-tan astam deńgeidi quraidy dep josparlanǵan», - dedi kompaniia basshysy.
Onyń sózine qaraǵanda, JEK úlesiniń ósýi eldiń energiia júiesi jumysynyń turaqtylyǵy men senimdiligin qamtamasyz etý turǵysynan jańa talaptar qoiady. Osyǵan bailanysty, 2030 jylǵa deiingi jalpy óndiristiń 10 paiyzyn JEK úlesine qol jetkizý boiynsha Úkimettiń qoiylǵan maqsattaryna qol jetkizý úshin, Energetika ministrligi KEGOC-pen birlesip Qazaqstannyń energiia júiesin jańǵyrtý boiynsha mindetterdiń tutas keshenin júzege asyryp jatyr.
«Bul birinshi kezekte, jańa manevrlik qýattar salý, energiia júiesin tsifrlandyrý, teńgerimdeýshi naryqty engizý, energiia jinaqtaý júiesin damytý, energiia júiesiniń jumysyn boljaý jáne modeldeý arqyly Qazaqstan biryńǵai energiia júiesin óndirýshi qýattar qurylymyn diversifikatsiialaý bolyp otyr. Jańa manevrlik elektr stantsiialaryn salý máseleleri 2020 jylǵy jeltoqsanda qabyldanǵan «Elektr energetikasy týraly» Zańǵa tiisinshe túzetýler engizýdiń arqasynda óz sheshimin tabýda. Qazirgi ýaqytta Energetika ministrliginiń basshylyǵy manevrlik generatsiialaý obektilerin ornalastyrý josparyn daiyndaý jáne jańa gaz stantsiialaryn salýǵa aýktsiondar uiymdastyrý boiynsha jumystar júrgizip jatyr. Kelesi jyly Qazaqstannyń ońtústiginde jańa manevrlik stantsiialardyń qurylysy bastalady dep kútilýde. Bul óz kezeginde jańa jańartylatyn energiia kózderi qurylysyn jedeldetýge múmkindik beredi», - dedi Baqytjan Qajiev.
