2021 jyldyń qańtar aiynda Qazaqstanda resmi dilerler 8 myńnan astam jańa kólik satty. Bul týraly «QazAvtoÓnerkásip» avtokólik salasyndaǵy kásiporyndar odaǵy habarlady.
«Atalǵan kezeńde resmi dilerler 8 136 kólikti satty. Bul bir jyl burynǵy kórsetkishten 56,7 paiyzǵa joǵary. Biylǵy qańtarda qazaqstandyqtar jańa jeńil kólikterdi alýǵa 80,5 mlrd teńge jumsap, 2020 jylǵy deńgeiden 68,4 paiyzǵa artyq boldy», - delingen taratylǵan málimette.
Kólik satyp alýshy 5 228 adam (64,3 paiyzy) otandyq zaýyttardyń ónimine óz tańdaýyn jasaǵan. Sonymen qatar, biylǵy qańtar aiynda satylǵan 2 908 avtomobil (35,7 paiyzy) importqa tiesili bolyp otyr.
Atalǵan merzimde elimizde suranysy joǵary brendterdiń arasynda Hyundai (2 392 kólik), Chevrolet (2 233), Toyota (1 046 ), Lada (575) jáne KIA (332) kólikteri kósh bastady.
Munymen qosa, satylymy joǵary bolǵan TOR-ondyqta – Nissan (249 kólik), JAC (246), Renault (200), Volkswagen (155) jáne GAZ (145) bar.
