Qazirgi ýaqytta qazaqstandyq tájiribege investitsiialyq jáne «jasyl» obligatsiialardy engizý máselesi pysyqtalýda. Atalǵan bondtardyń qarjylandyrý quraly retindegi mańyzdylyǵy týraly QR Qarjy naryǵyn retteý jáne damytý agenttiginiń baǵaly qaǵazdar naryǵy departamenti direktorynyń mindetin atqarýshy Gúlchehra Talqambaeva aityp berdi, dep habarlaidy QazAqparat.
Biyl 2 qańtarda «Qazaqstan Respýblikasynyń keibir zańnamalyq aktilerine ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» Zań qabyldandy, onyń baǵyttarynyń biri qarjy quraldarynyń jańa túrlerin engizý.
«Bizdiń elimiz qazir jasyl ekonomikaǵa kóshýdi ilgeriletýde, osyǵan bailanysty memleket qorshaǵan ortany qorǵaýǵa baǵyttalǵan qyzmetti yntalandyrý jóninde birqatar sharalardy kózdedi. «Jasyl» qarjylandyrý sheńberindegi jobalarǵa memlekettik qoldaý kórsetý sharalary kórsetiletin bolady. Investitsiialardy tartýǵa arnalǵan quraldardyń biri «jasyl» obligatsiialar,- dedi Gúlchehra Talqambaeva.
Spiker túsindirgendei, «jasyl» obligatsiialar – bul boryshtyq baǵaly qaǵaz, onyń kómegimen kompaniia («jasyl» obligatsiialar shyǵarǵan emitent) ekologiialyq problemalardy sheshýmen bailanysty jobalardy iske asyrý úshin qarajat tartady. «Jasyl» obligatsiialar arqyly qarjylandyrý úshin «jasyl» jobalardy jikteýdi QR Ekologiia ministrligi ázirleidi jáne QR Úkimeti bekitedi. Júginý merzimi, kýpondy tóleý kezeńdiligi, ainalys, óteý talaptary jáne basqalary emitenttiń «jasyl» obligatsiialardy shyǵarý talaptarynda kózdeledi.
Kez kelgen basqa baǵaly qaǵazdar siiaqty, «jasyl» obligatsiiany kommertsiialyq uiymdar shyǵarýǵa quqyly. Shyǵarylym «baǵaly qaǵazdar rynogy týraly» QR Zańynyń talaptaryna sáikes júzege asyrylady. «Jasyl» obligatsiialar, basqa obligatsiialar siiaqty, ainalys merzimi boiynsha ár túrli bolýy múmkin, qamtamasyz etilgen nemese qamtamasyz etilmegen, aiyrbastalatyn nemese aiyrbastalmaityn.
«Jasyl» obligatsiialardy ornalastyrýdan alynǵan aqsha qoldanystaǵy tabiǵi resýrstardy paidalaný tiimdiligin arttyrýǵa, qorshaǵan ortaǵa teris áser etý deńgeiin tómendetýge, energiia tiimdiligin, energiia únemdeýdi arttyrýǵa, klimattyń ózgerý saldaryn jumsartýǵa jáne klimattyń ózgerýine beiimdelýge baǵyttalǵan jobalardy qarjylandyrýǵa bailanysty maqsattarǵa ǵana paidalanylýy múmkin», - deidi Gýlchehra Talqambaeva.
Onyń aitýynsha, emitent «jasyl» obligatsiialardy ornalastyrý merzimi ishinde qarjylandyrylatyn jobanyń qorshaǵan ortaǵa áseri boiynsha jyl saiynǵy esepti jariialaýǵa mindetti.
Sonymen qatar, ol tabystylyǵy aldyn ala belgilengen oqiǵalardyń bastalýyna bailanysty bolatyn investitsiialyq obligatsiialar - baǵaly qaǵazdar qalai jumys isteitini týraly aityp berdi.
«Halyqaralyq tájiribege sáikes, negizgi syiaqyny alýmen qatar, investitsiialyq obligatsiiany ustaýshynyń belgili bir jaǵdailardyń týyndaýyna ne týyndamaýyna bailanysty qosymsha syiaqy alýǵa quqyǵy bar. Investitsiialyq obligatsiialar boiynsha kiristilik ol táýeldi bazalyq aktiv qunynyń serpinine bailanysty bolady», - dep túsindirdi spiker.
Investitsiialyq obligatsiialar qor birjasynyń tizimine engizilýi nemese tiisti azamattyq-quqyqtyq mámileler jasasý arqyly alańnan tys ornalastyrylýy múmkin.
Bul rette, spiker atap ótkendei: investitsiialyq obligatsiialar shyǵarylymy ýákiletti organda - Qazaqstan Respýblikasynyń Qarjy naryǵyn retteý jáne damytý agenttiginde mindetti memlekettik tirkeýge jatady.
Spikerdiń aitýynsha, obligatsiia boiynsha kiristiń belgili bir kórsetkishke, indikatorǵa nemese indekske qosylýy belgili bir naryqta mamandandyrylǵan jáne uzaq merzimdi boljamdar jasai alatyn investorlar úshin tartymdy.
Ekinshi jaǵynan, bul baǵaly qaǵaz ol boiynsha syiaqy tóleý sharttaryn neǵurlym ikemdi etýge jáne osylaisha emitenttiń naryqtyq táýekelderin tómendetýge múmkindik beredi. Tólemder emitent tabysynyń mólsherine, baǵaly qaǵazdardyń nemese ózge de qarjy quraldarynyń paiyzdyq mólsherlemelerine jáne baǵa belgileýlerine, baǵaly metaldardyń, shikizattyń nemese ózge de taýarlardyń baǵa belgileýlerine, qor jáne taýar indeksterine, úshinshi tulǵalardyń mindettemelerdi oryndamaýyna bailanysty bolýy múmkin.
«Qazirgi ýaqytta Agenttik memlekettik tirkeý tártibin, sondai-aq investitsiialyq jáne «jasyl» obligatsiialardy shyǵarý, ainalysqa shyǵarý jáne óteý tártibine qoiylatyn talaptardy kózdeitin tiisti túzetýlerdi ázirleýde. Osyndai baǵaly qaǵazdardy engizýdi aǵymdaǵy jyldyń sońyna deiin júzege asyrý josparlanyp otyr. Qazaqstannyń «jasyl» ekonomikaǵa kóshýin eskere otyryp, bul qaǵaz áleýetti emitentterdiń de, investorlardyń da qyzyǵýshylyǵyn týdyrady dep oilaimyz», - dep qorytyndylady Gúlchehra Talqambaeva.
