Qazaqstanda jańa investitsiialyq salyq sasaty engiziledi. Bul týraly búgin halyqpen eseptik kezdesý ótkizgen Ulttyq ekonomika ministri Rýslan Dálenov aitty, dep habarlaidy QazAqparat tilshisi.
«Ministrlikke berilgen investitsiialyq saiasat jónindegi ókilettikti negizge ala otyryp, investitsiia tartýdyń ekojúiesin qurý aiasynda jumystardy jandandyrý kózdelip otyr. Qazirdiń ózinde túzetýler daiyndalyp jatyr», - dedi ol.
Onyń aitýynsha, ministrliktiń janynda investitsiialyq zańnama men ahýaldy jaqsartý boiynsha naqty usynystar ázirleý jónindegi Investitsiialyq shtab jumys isteidi.
«Biz ázirlegen zańnamalyq túzetýlerde investorlarǵa ekonomikanyń basym salalaryndaǵy iri jobalar boiynsha turaqty jaǵdai týǵyzý kózdeledi. Sonymen qatar Salyq kodeksinde investitsiialyq salyq krediti qarastyrylǵan. Óitkeni kásiporyndar jumysyn bastaǵan kezde ádette olardyń ainalym qarajattary óte az bolady. Buǵan qosa, salyq tóleý qajet. Sol sebepti biz, eger kásiporyn basym salada bolsa, onda olarǵa investitsiialyq salyq kreditin usynamyz. Salyqty tólemei-aq qoi, birneshe jyldan keiin beresiń», - dedi R.Dálenov.
