QR Ádilet ministri Qanat Mýsin «Halyq derbestigi» men «Namys» partiialaryn qurýǵa qatysty qujattar tirkeý rásiminiń birinshi kezeńinen ótkenin aitty, dep habarlaidy QazAqparat.
«2019 jyldan beri Ádilet ministrligine 17 partiiany tirkeýge qatysty bastamashy toptan ótinim kelip, qujat tapsyryldy. Qazirgi ýaqytta ekeýi birinshi kezeńnen ótip, partiia qurý máselesimen ainalysyp jatyr. Osy oraida «Halyq derbestigi» men «Namys» birinshi kezeńdegi jumystardy atqardy», - dedi Mýsin elordada ótken baspasóz máslihatynda.
Osy oraida ol zańnama boiynsha partiiany tirkeý rásimi eki kezeńnen turatynyn eske saldy. Birinshiden, partiia qurý nieti týraly habarlama beriledi, oǵan 1 myń adamnyń tizimi qosylýy kerek. Bul málimetterdi Ádilet ministrligi tekseredi.
«Bul tizimniń arasynda ómirden ótken adamdar, quqyq qorǵaý organdary men áskeri qyzmetshiler bolmaýy kerek. Zań boiynsha bul adamdarǵa partiiaǵa múshe bolýǵa tyiym salynǵan. Sonymen qatar, kámeletke tolmaǵan balalar men basqa partiianyń músheleri atalǵan tizimge qosylmaidy. Tekserý barysynda bul adamdar tizimde bolsa, bastamashy toptyń quramyndaǵylar 1 myńnan azaiyp qalsa, onda ministrlik qujattardy qaitarady», - dedi ministr.
Mýsinniń aitýynsha, bul jaǵdaida bastamashy topty qaita quryp, atalmysh kemshilikterdi joiyp, qujattardy qaita tapsyrýǵa bolady.
«Qujattar durys tapsyrylsa, onda bastamashy toptyń qujattary ekinshi kezeńge ótedi. Olar partiianyń sezderin ótkizip, óńirlerde fililaldaryn ashyp, múshelerin tirkep, tiisti qujattardy ministrlikke ótkizedi. Sonymen qatar, zań boiynsha partiia músheleriniń sany 20 myń bolýy tiis», - dedi vedomstvo basshysy.
«Parlamentke engizilgen zań jobasynda Prezidenttiń bastamashylyǵymen tiisti ózgerister eskerilgen. Zań qabyldanǵannan keiin, bastamashy top tizimindegiler sany 1 myńnan 700 adamǵa deiin kemidi. Al tirkeý múmkindigin arttyrý úshin partiia músheleriniń sany 20 myńnan 5 myńǵa deiin azaiady. Sondyqtan partiia tirkeý rásimi jeńildeidi. Qazirgi ýaqytta atalǵan eki partiia sez ótkizý áreketin jasap jatyr», - dedi Qanat Mýsin.
