Qazaqstandyqtardyń naqty jalaqylary tómendeýde. Aǵymdaǵy jyldyń ekinshi jartyjyldyǵynda jaldamaly jumysshylardyń jalaqylarynyń satyp alý qabileti ótken jylǵy deńgeiimen salystyrǵanda 2,9 paiyzǵa qysqardy. Bul týraly Ranking.kz saity habarlady.
Esterińizge sala ketsek, aǵymdaǵy jyldyń qańtar-naýryz ailarynda Qazaqstandaǵy jalaqy qunynyń jyldyq quldyraýy 2 paiyzdy quraǵan bolatyn. Bul rette Qazaqstan turǵyndarynyń ortasha ailyq ataýly jalaqylary 4,4 paiyzǵa ósti. Biraq negizgi tutyný taýlarlary men qyzmetter baǵasynyń ósimi joǵary boldy. Sonyń saldarynan eldegi eńbek tabysynyń naqty quny tómen bolyp otyr. Jaldamaly jumystyń ulttyq naryǵy kólemi jaǵynan qaita qalpyna kelýge tyrysýda. Alaida ósim barynsha álsiz júrýde. Aǵymdaǵy jyldyń qańtar-maýsymynda Qazaqstandaǵy jaldamaly jumysshylardyń naqty sany 3,5 mln adamdy qurady. Bul bir jyl burynǵy san deńgeiinen 1,5 paiyzǵa joǵary.
Aita keterligi, ótken jyly eńbek naryǵynyń kólemi kúrt qysqaryp, ortasha jyldyq deńgeidegi kórsetkishtiń kemýi 5,4 paiyz boldy. Sońǵy 5 jyldyń ishinde respýblikadaǵy jaldamaly jumysshylardyń eń kóp sany 2015 jyly 3,6 mln adam bolyp tirkeldi.
2017 jyldyń 2 toqsanynda Qazaqstannyń ne bári 2 óńirinde ǵana naqty jalaqy ósimi tirkeldi. Olar: Aqtóbe (1,3 paiyz) jáne Mańǵystaý (0,8) oblystary. Sáýir-maýsymda jalaqynyń satyp alý qabiletiniń barynsha qysqarýyn Atyraý turǵyndary sezindi. Bul óńirde naqty jalaqy 2016 jyldyń 2 toqsanymen salystyrǵanda birden 13,3 paiyzdy qulady. Astanada jumysshylardyń jalaqysy 0,1 paiyzǵa kemidi. Al Almatyda naqty jalaqynyń quldyraýy jyldyq mánde 5,2 paiyzdy qurady.
Aǵymdaǵy jyly Qazaqstanda nátijeli jumyspen qamtý jáne jappai kásipkerlikti damytý baǵdarlamasy bastalady. Baǵdarlama 2021 jylǵa deiin jumys isteidi. Ol júzege asyrylǵannan keiin Qazaqstandaǵy jumyssyzdyq deńgeii 4,8 paiyzǵa qysqarady dep kútilýde.
