Agrarlyq sektordaǵy eń tómengi jalaqy alatyn mamandyqtardyń biri - veterinarlyq dárigerler. Bul týraly QR Aýyl sharýashylyǵy ministri Erbol Qarashókeev aitty, dep habarlaidy QazAqparat.
«Respýblika boiynsha mal dárigerleriniń ortasha jasy 40-55 jasty quraidy. Veterinarlyq sektorda jas, joǵary bilikti kadrlar jetispeidi. Qazirgi zamanǵy qoǵamnyń úrdisterimen teń tabys tabý múmkindiginiń bolmaýy, jumystyń qiyndyǵy, aýyldyq jerlerdegi infraqurylymnyń damymaýy jas mamandardyń mal dárigeri kásibine degen qyzyǵýshylyǵyn tómendetti», - dedi Qarashókeev.
Onyń aitýynsha, biylǵy 1 sáýirdegi jaǵdai boiynsha Memleket basshysynyń tapsyrmasyna sáikes, memlekettik tapsyrysty oryndaý úshin tarifterdi kóterý esebinen respýblika boiynsha orta eseppen veterinariialyq mamandardyń jalaqysy 33,4%-ǵa ósti. Jyl sońyna deiin odan ári 60%-ǵa deiin ulǵaitý josparlanyp otyr.
«Qazirgi ýaqytta kommýnaldyq veterinarlyq kásiporyndardyń ortasha ailyq jalaqysy óńirlerge bailanysty 80 myńnan (Qyzylorda oblysy) 206 myńǵa deiin (Pavlodar oblysy) teńgeni quraidy. Alaida, bul jetkiliksiz», - dedi ministr.
Bul máselelerdi sheshý úshin kelesi is-sharalar usynyldy:
1. Básekelestik sektory joq jerlerde kommýnaldyq veterinariialyq kásiporyndar kórsetetin aqyly qyzmetter kólemin ulǵaitý. Ol úshin barlyq jerde aqyly qyzmet túrleriniń tarifteri bekitiledi.
2. Tiisti zańnamalyq bazany qabyldai otyryp, kelesi jyldan bastap kommýnaldyq veterinariialyq kásiporyndar veterinariia mamandarynyń laýazymdyq jalaqysyna 50%-dyq qosymsha ústemaqy jáne ziiandy eńbek jaǵdailary úshin (patogendigi 1-shi jáne 2-shi sanattaǵy bioagenttermen jumys isteý) memlekettik kommýnaldyq mekemelerdiń bazalyq laýazymdyq jalaqysyna 140%-dyq qosymsha aqy tóleý, sondai-aq saýyqtyrý járdemaqysy retinde 2 laýazymdyq jalaqy tóleý. Bul sharalar mal dárigeri kásibiniń tartymdylyǵy men bedelin edáýir arttyrady.
