Úkimet basshysynyń orynbasary Eraly Toǵjanov «Elde vaktsinalaý mindettelýi múmkin be?» degen suraqqa jaýap berdi, dep habarlaidy "Ult aqparat".
«Meniń oiymsha, PTR testilerden ótý emes, qalai bolǵanda da bárimizdiń vaktsina alǵanymyz durys bolady. Osy baǵytta jumys isteitin bolamyz. Sizder de bul baǵytta qoldaý kórsetesizder dep oilaimyn. Al qalǵany epidemiologiialyq jaǵdaiǵa bailanysty bolmaq. Qatań nusqalarǵa jol bere almaimyz», - dep jaýap berdi spiker QR Prezidenti janyndaǵy Ortalyq kommýnikatsiialar qyzmetinde.
Osyǵan bailanysty spiker vedomstvoaralyq komissiianyń vaktsina saldyrý boiynsha alǵashqy qadamdar jasaǵanyn atap ótti.
«Vedomstvoaralyq komissiiada qaralǵan sharalar qabyldandy. Is júzinde barlyq óńirlerde birinshi kezekte qyzmet kórsetý salasynda mańyzdy qadamdar qabyldaý boiynsha jedel daiyndyq júrip jatyr, ol týraly biz sizdermen sóilestik. Sondyqtan bizdiń aldaǵy áreketterimiz osy jumystyń nátijelerine bailanysty bolady. Biz osynyń bárin qadaǵalaityn bolamyz jáne sizder de habardar bolasyzdar», - dep atap ótti Eraly Toǵjanov.
Al densaýlyq saqtaý ministri vaktsina saldyrý mindetin barlyǵyna birdei engizý úshin zańnamaǵa ózgeris engizý kerektigin jetkizdi. Oǵan da biraz ýaqyt qajet.
"Kez kelgen zańdy ózgertý úshin ony talqylaýdan ótkizý kerek. Oǵan kem degende jarty jyl ketedi. Ondai ózgerister men túzetýlerdi engizý úshin kei kezde bir jyl qajet. Degenmen, qazirgi kezde bir qoldanystaǵy zańnamanyń mehanizmderin iske qosyp jatyrmyz, keibir adamdarǵa tańdaý berip otyrmyz. Vaktsina saldyra ma, PTR-test tapsyra ma, ózderi sheshedi. Jalpy, halyq úshin ekpe salý erikti túrde bolyp qalyp otyr", - dedi Tsoi.
Aita keteiik, koronavirýstyń taralýyna jol bermeý jónindegi vedomstvoaralyq komissiia qyzmet kórsetý salasynda, ónerkásip kásiporyndarynda jáne ózge de 20 adamnan asatyn ujymdarda mindetti vaktsinalaýdy engizýdi usyndy. Al ekpeden bas tartqandar apta saiyn PTR-test tapsyrady. Bas memlekettik sanitar dárigerdiń qaýlysynan keiin osy talaptar zańdy kúshine enedi.
