Belgili allergolog-immýnolog Rafail Rozenson pandemiianyń aiaqtalý yqtimaldyǵyna qatysty pikir bildirdi, dep habarlaidy QazAqparat.
«Biz pandemiialyq jaǵdai aiaqtalǵan nemese aiaqtalýǵa jaqyn úsh el bar ekenin bilemiz. Bul elderdiń tájiribesi neni kórsetti? Vaktsina alǵan adamdardyń 70%-yna jetkennen keiin aýrý juqtyrý kórsetkishi toqtady (Izrail) nemese 0-ge jaqyndap keledi (AQSh jáne Ulybritaniia). Mysaly, búginde Izrailde 40-qa jýyq adam reanimatsiiada jatyr. Al bir jyl buryn budan áldeqaida kóp adam aýrýhanada jatqan edi», - dedi Rafail Rozenson Densaýlyq saqtaý ministrligi uiymdastyrǵan dáriste.
Sarapshy Italiia men Ispaniiadaǵy, AQSh-taǵy jaǵdailarǵa da toqtaldy.
«Byltyr Italiia men Ispaniiada bir ýaqytta ondaǵan myń adam aýyrǵanyn bilesizder. Olar vaktsinalaýdy birinshi bolyp bastady da, naýryz aiynda ekpe alǵandardyń úlesi 65%-ǵa jetti. Sodan keiin syrqattaný kórsetkishi azaiyp keledi. AQSh-ta vaktsinalaý qańtar aiynda bastaldy. Al mamyrda aitarlyqtai jetistikterge jetti. Búginde olardyń shamamen 70%-y ekpe alǵan. Sonymen qatar, aýrý jaǵdaiy eń tómengi kórsetkishterge jaqyndap keledi. Britandyqtar da olardy ókshelep jetip qaldy», - dedi immýnolog.
Allergolog infektsiiany tek jappai vaktsinatsiia arqyly jeńýge bolatynyna senim bildirdi.
«Vaktsinaǵa qarsylar qansha aiqailasa da, álem halyqtyń 75%-dan astamy vaktsina alsa, mýtatsiialanǵan virýsty jeńetinin kórsetti. Óitkeni virýstyń tizbegi úziledi. Aýrý juqtyrý kórsetkishi qulasyn desek, eń bolmaǵanda 70-75 paiyz halyq vaktsina alýy kerek. Meniń bilýimshe, A.Tsoi myrza 1 maýsymda bergen esebinde 3,2 million qazaqstandyq vaktsina alǵanyn málim etti. Meniń túsinýimshe, qazir bizde aiyna 2 million adamdy vaktsinalaý múmkindigi bar. Sonda ujymdyq immýnitettiń 60%-dyq kórsetkishine qol jetkizý úshin 11 mln adam qajet bolsa, biz qyrkúiek aiynyń sońyna deiin osy mejege jetemiz», - dep túiindedi Rafail Rozenson.
