QR Premer-Ministriniń orynbasary Eraly Toǵjanov «Koronavirýstyń úndi shtamyna bailanysty áýe reisteri jabylýy múmkin be?» degen suraqqa jaýap berdi, dep habarlaidy QazAqparat.
«Biz eshkimmen áýe koridoryn jappaimyz. Bizde 150-ge jýyq reis bar, 14 elmen tyǵyz bailanys ornatylǵan. Ózderińiz bilesizder, biz baiaǵyda-aq qaýipsizdik sharalaryn qabyldaǵanbyz: Qazaqstanǵa keletin barlyq azamattarǵa PTR-test mindettelgen. Bul tipti shetelde júrgen azamattarǵa da qatysty. Áýe keńistigin shekteý áli josparlanyp otyrǵan joq», - dedi spiker Ortalyq kommýnikatsiialar qyzmetinde tilshi suraǵyna orai.
Buǵan deiin Eraly Toǵjanov «Qazaqstanda úndi shtamyna bailanysty lokdaýn jariialanýy múmkin be?» degen saýalǵa jaýap bergen edi.
«Búgingi kúni respýblika aýmaǵyna lokdaýn engizýge bailanysty esh másele kórip otyrǵan joqpyz. Ol kún tártibinde de joq. Keshe vedomstvoaralyq komissiia otyrysynda Nur-Sultan qalasynda naqty shekteý sharalaryn qabyldadyq. Sóz joq, onyń bárin aldyn alý sharalary dep aitýǵa tolyq múmkindik bar. Onyń ishinde naqty obektiler men qyzmet kórsetý salasyna, halyq kóp jinalatyn saýda ortalyqtaryna bailanysty qandai sharalar qolǵa alynǵanyn ózderińiz estidińizder. Sondyqtan qazir osy sharalar ainalasynda jumys istei beremiz. Ári qaraiǵy sheshim qabyldaýymyz eldegi epidemiologiialyq jaǵdaiǵa bailanysty bolady», - dep jaýap berdi Eraly Toǵjanov.
Aita keteiik, 22 maýsymda elordada koronavirýstyń úndi shtamy anyqtaldy. Koronavirýstyń «Delta» shtamynyń juǵý qaýpi joǵary jáne osy shtamm anyqtalǵan naýqastardyń 60 paiyzynda 7 kúnge deiingi barynsha qysqa inkýbatsiialyq kezeń baiqalǵan.
