Elimizde ulttyq sanaq júrgizý bir jyl keiinge qaldy, dep habarlaidy "Ult aqparat" statistika komitetine silteme jasap.
Komitettiń resmi saityndaǵy málimetke sensek, Úkimet ótken jyly 19 maýsymda 2020 jyly ulttyq sanaq ótkizý týraly qaýly shyǵarǵan. Oǵan sáikes, Qazaqstan Respýblikasynyń ulttyq halyq sanaǵy biylǵy 1-30 qazan aralyǵynda ótýge tiis edi.
«Elimizde koronavirýs infektsiiasynyń taralýy men engizilgen karantin sharalaryna bailanysty ulttyq halyq sanaǵyn 2021 jylǵy qazan aiyna aýystyrý jóninde sheshim qabyldandy» dep málimdeidi komitet.
Ulttyq halyq sanaǵyn ótkizý ádisi ózgerissiz qalady.
Iaǵni 1-15 qazan aralyǵynda mamandandyrylǵan sanaq.gov.kz saitynda internet-saýalnama júrgiziledi, al 1-30 qazan aralyǵynda málimetterdi jinaý úshin interviýerler jaýapty planshette tirkei otyryp, halyqqa jappai saýalnama júrgizedi.
Eske sala keteiik, buǵan deiin Ulttyq ekonomika ministri Rýslan Dálenov indetke bailanysty halyq sanaǵy kelesi jylǵa shegerilýi múmkin ekenin habarlaǵan bolatyn.
«Jalpy Qazaqstanda halyq sanaǵyn 2020 jyldyń 1 qazanynan bastap júrgizý josparlanǵan. Alaida halyq sanaǵyn júrgizetin qyzmetkerler halyqpen jaqyn qarym-qatynasta eńbek etetindikten, koronavirýs infektsiiasy qaýpiniń aldyn alý maqsatynda Ulttyq ekonomika ministrligi Úkimetke sanaqty kelesi jylǵa shegerýdi usyndy. Mundaǵy negizgi sebep – halyqtyń jáne halyq sanaǵyn júrgizetin personaldyń amandyǵy. Biz tiisti sheshimdi kútip otyrmyz», - degen edi ministr baspasóz máslihatynda.
