Sýret: Pixabay
2025 jyly ulttyq biryńǵai test tapsyrýdyń jańa formaty pilottyq joba retinde iske qosylady. Bul týraly Ǵylym jáne joǵary bilim ministri Saiasat Nurbek málimdedi, dep habarlaidy "Ult aqparat".
Ministrdiń aitýynsha, álemniń kóptegen elinde testileýdi alyp tastaý máselesi qyzý talqylanyp jatyr.
"Máselen AQSh pandemiia kezinde standartty testti alyp tastady jáne ýniversitetter óte kúrdeli máselege tap boldy. Ortalyqtandyrylmaǵan oqýǵa túsý júiesine qaramastan, kem degende stýdentterdi baǵalaý, salystyrý jáne irikteý úshin qandai da bir standart qajet", – deidi Saiasat Nurbek.
Onyń aitýynsha, ministrlik 2021 jyldan bastap dúniejúzilik banktiń qoldaýymen UBT formatyn qaita qurý jáne eń bastysy – test suraqtarynyń mazmunyn túbegeili qaita óńdeý boiynsha úlken jobany iske qosqan.
"Aldyńǵy jyly biz eki baǵyt boiynsha jumys istedik. Birinshisi – jańa format boiynsha test daiyndaý. Barlyq suraqtardy mazmundy túrde qaita qaraý kerek boldy. Ótken aptada bul komponent aiaqtaldy. Test daiyndaýdy álemge áigili frantsýz kompaniiasy júrgizdi. Jańa model boiynsha 350 testolog daiyndaldy", – dedi ministr.
Ekinshi baǵyt – finliandiialyq kompaniialar tobymen UBT qurylymy boiynsha jumys.
"Bul arnaiy oqytylǵan testologtar toby SIT formatyna uqsas jańa ádisteme boiynsha suraqtar daiyndai bastaidy, bul halyqaralyq deńgeide tanylǵan test. Oǵan qosa, biz bazany qurǵanda jańa UBT formatyn pilottyq túrde bastaý úshin kem degende 50 myń suraq ázirleýimiz kerek. Munda da muqiiat, uqypty bolýymyz kerek, óitkeni formattyń kúrt ózgerýi de úlken problemalarǵa alyp keledi, joǵary synyp oqýshylaryn osy formatqa daiyndaý qajet", – dep atap ótti Saiasat Nurbek.
Vedomstvo basshysy osy jyldan bastap ministrlik úlken pilottyq jobaǵa daiyndyq bastaitynyn aitty.
"Biz pilottyq jobany kelesi jyly bastaimyz, joba UBT formatyn birden ózgertpeidi, belgili bir pilottyq rejimde iske qosylady. Birte-birte biz SIT halyqaralyq standartyna kóshemiz, onda árbir talapkerdiń ózi testileý ornyn, ýaqytyn tańdaidy, daiyndalady, tapsyrady, sertifikat alady, sonymen oqýǵa túsedi", – dedi ministr.
