Qazaqstan Respýblikasynyń Qorǵanys ministri Nurlan Ermekbaev óńirlik áskerdi arnaýly jiynǵa shaqyrý jumysy jeńil ári shekteýli sipatta ótetinin aitty, dep habarlaidy QazAqparat.
«Azamattar turǵylyqty jeri boiynsha shaqyrylady. Ár kesh saiyn úiine qaitady. Áskeri qyzmetke jumysqa barǵandai tańerteń keledi. Aimaqtarda arnaýly jiyn Bas shtabtyń kelisimimen jergilikti atqarýshy organnyń sheshimi boiynsha kezeń-kezeńimen ótkiziledi. Iaǵni bir ýaqytta bolmaidy. Arnaýly jiynǵa shaqyrtýdy qabyl alý – kúrdeli kezeńde patriottyqty tanyta bilýdiń múmkindigi. Qarýly kúshter birinshi kúnnen bastap ártúrli mindetterdi oryndaýǵa atsalysyp keledi. Qazirdiń ózinde eldegi 24 qalada 10 myńǵa tarta áskeri qyzmetker jumyldyrylǵan. Olar patrýldeý, dezinfektsiialaý jáne taǵy basqa qajetti sharalardyń bárin atqaryp keledi. Búgingi kúni áleýmettik mańyzy bar 2 myńǵa tarta nysan tazartyldy. Radiatsiialyq, himiialyq jáne biologiialyq qaýipsizdikke bailanysty áskeri qyzmetshiler azamattyq qorǵanys salasyna beiimdelip, mindetterin atqarýda», - dedi Nurlan Ermekbaev OKQ-da ótken baspasóz máslihatynda.
Ministrdiń aitýynsha, qorǵanys salasy Densaýlyq saqtaý ministrligine kómek kórsetip, qazir Almaty oblysynda áskeri-dalalyq aýrýhana ornalastyrylǵan.
«Áskeri-kóliktik aviatsiia azamattardy shetelden evakýatsiialaý jumystaryn júrgizip jatyr. Jalpy óńirlik áskerdi arnaýly jiynǵa shaqyrý sipaty jaǵynan jeńil ári shekteýli bolady. Azamattar úshin eshqandai yńǵaisyzdyq týyndamaidy», - dedi Qorǵanys ministri.
Eske sala ketsek, keshe Qazaqstan Prezidenti áskeri mindettilerdi arnaýly jiynǵa shaqyrý týraly Jarlyq shyǵarǵan edi.
