Tótenshe jaǵdai kezinde qazaqstandyqtar ataýly áleýmettik kómekti memlekettik mekemelerge júginbei ala alady, dep habarlaidy "Ult aqparat".
«Biylǵy sáýir aiynan bastap qazaqstandyqtar tótenshe jaǵdai kezinde memlekettik organdarmen bailanyssyz ataýly áleýmettik kómekti (AÁK) ala bastaidy. Áleýmettik kómekti qaita taǵaiyndaý úshin memlekettik organdardyń aqparattyq bazalary arqyly derekterdi tekserý júrgiziledi. Atap aitqanda, turǵylyqty jeri boiynsha tirkeý, jyljymaityn múliktiń bar-joǵy, kirister qamtylady. Eger otbasy quramy ózgermegen jaǵdaida, taǵaiyndaýǵa ótinish qolda bar derekter negizinde qalyptastyrylatyn bolady. Bul úshin halyqty jumyspen qamtý ortalyqtarynyń qyzmetkerleri 1-toqsanda AÁK alǵan azamattar úshin óz betinshe ótinish jasaidy jáne AÁK taǵaiyndaý ólshemderine sáikestigin tekseredi», - delingen Eńbek jáne halyqty áleýmettik qorǵaý ministrligi habarlamasynda.
Bul turǵyda barlyq aqparat, sondai-aq habarlamalar elektrondyq poshta nemese messendjerler arqyly jiberiletin bolady.
1-toqsanda ataýly áleýmettik kómek almaǵan azamattarǵa AÁK taǵaiyndaý úshin egov.kz portaly arqyly ótinish jiberý qajet. Ári qarai jumyspen qamtý ortalyqtarynyń qyzmetkerleri qujattardy memlekettik organdardyń málimetter bazasynda tekserip, nátijesin elektrondyq poshta nemese messendjerler arqyly habarlaidy.
Bul rette ýchaskelik komissiialar kóshpeli tekserýler júrgizbeidi. Barlyq qajetti qujattardy azamattardan elektrondyq poshta arqyly nemese messendjerler arqyly suratatyn bolady.
Esterińizge sala keteiik, biyldyń basynan beri AÁK alýshylar 102,4 myń otbasy nemese 527,6 myń adam boldy. AÁK alýshylardyń 41,5 paiyzyn kópbalaly otbasylar qurady.
