Qazaqstanda turý erejelerin buzǵan 7 572 shetel azamaty anyqtaldy, dep habarlaidy "Ult aqparat" QR IIM baspasóz qyzmetine silteme jasap.
«Osy jyldyń 16 qańtarynan bastap 20 qańtaryna deiin Qazaqstan aýmaǵynda úshinshi el sanatyndaǵy migranttardyń zańsyz kóshi-qonyn anyqtaý jáne boldyrmaý, zańsyz kóshi-qon arnalaryn uiymdastyrýshylardyń is-áreketterin shekteý maqsatynda «Migrant» jedel aldyn-alý is-sharasy ótkizildi. Sonyń nátijesinde Qazaqstan Respýblikasynda bolý erejelerin buzǵan 7 572 shetel azamaty anyqtaldy. Sot sheshimi boiynsha olardyń 703-i elden shyǵarylyp, 715 adam qabyldaý-taratý ortalyqtaryna ornalastyryldy», - delingen habarlamada.
Ishki ister ministrliginiń málimetteri boiynsha, sheteldik jumys kúshin tartý jáne paidalaný erejelerin buzǵany úshin 253 jumys berýshi ákimshilik jaýapqa tartylǵan.
Naqtyraq aitqanda, Atyraý oblystyq politsiia basqarmasynyń zańsyz kóshi-qonmen kúresý jónindegi arnaiy bóliminiń qyzmetkerleri aǵyndy sýlardy tazartý qurylystaryna qyzmet etetin óndiristik bazanyń aýmaǵynda zańsyz eńbekpen ainalysatyn Ózbekstan azamattaryn ustaǵan. Sheteldiktermen birge jumys berýshi de ákimshilik jaýapqa tartylyp otyr.
Migratsiialyq zańdardy buzǵany úshin aldyn-ala tergeýdiń biryńǵai reestrinde 66 qylmystyq is tirkeldi.
Máselen, Shymkent politsiia departamentiniń zańsyz kóshi-qonǵa qarsy kúres jónindegi arnaiy bóliminiń qyzmetkerleri Qazaqstan Respýblikasynyń memlekettik shekarasyn zańsyz kesip ótken Aýǵanstan azamatyn ustaǵan.
«Izdeýde júrgen 32 qylmysker ustaldy. Onyń ishinde tórteýi TMD azamaty. Jalpy, migratsiialyq zańnamalardy buzǵany úshin 3 877 sheteldiktiń elimizde ýaqytsha bolý merzimi qysqartyldy», - dep tolyqtyrdy baspasóz qyzmetinen.
