Búgin Májilistegi Úkimet saǵatynda QR Mádeniet jáne sport ministri Dáýren Abaev týrizm baǵytyndaǵy investitsiialyq jobalar týraly aityp berdi, dep habarlaidy QazAqparat.
«Biznestiń investitsiialyq belsendiligi jandandy. Destinatsiiasy eń joǵary 10 óńirde 2019-2021 jyldary jalpy somasy 395,5 mlrd teńge bolatyn 276 investitsiialyq joba paidalanýǵa berildi. 5 200 jańa jumys orny quryldy. Ótken jyldyń basynan beri jalpy somasy 226 mlrd teńge bolatyn 102 nysan iske qosyldy. 2019-2021 jyldarda júzege asyrylǵan eń iri jobalardan: Túrkistandaǵy «Kerýen-Sarai» keshenin, «Rixos Turkistan» jáne «Hampton by Hilton» qonaq úilerin, Aqtaý qalasyndaǵy «Rixos Water World Aktau» keshenin jáne «Tetys Blu» parkin, Nur-Sultan qalasyndaǵy «Sheraton» qonaq úiin, Býrabai-Shýchinsk kýrorttyq aimaǵyndaǵy «Baitas» qonaq úiin, sondai-aq, «Swissotel Almaty» jáne basqa da jobalar iske qosyldy», - dedi D. Abaev.
Sonymen qatar ol investitsiiasynyń jalpy kólemi 1,5 trln teńgeni quraityn 145 jobany júzege asyrý jalǵasyp jatqanyn, onda 7 myńnan astam jumys orny qurylatyndyǵyn jetkizdi.
«Oǵan qosa, baǵalaý somasy 1,5 trln teńgeni quraityn 46 investitsiialyq joba pysyqtalyp jatyr. Memlekettik baǵdarlama qabyldanǵan sátten bastap týrdestinatsiia infraqurylymynyń alǵashqy ondyǵynyń jalpy qajettiliginen 97 jobany júzege asyrýǵa túrli baǵdarlamalar men josparlar boiynsha 140,4 mlrd teńge bólindi. Onyń ishinde 2021 jyly 50 jobaǵa 63,5 mlrd teńge bólindi. Búgingi tańda 47 infraqurylym jobasy aiaqtaldy. Mysaly, byltyr Aqtaý qalasyndaǵy Jyly jaǵajaidy igerý baǵytynda tike avtojolmen, elektr qýatymen jáne sýmen qamtamasyz etý jumystary qarqyndy júrgizildi. Sondai-aq Alakól kóliniń ońtústik bóligindegi jaǵalaýdy bekitý jumystaryna, týristik maýsymǵa deiin aiaqtalýy josparlanǵan Úsharal jáne Úrjar áýejailaryn qalpyna keltirý jumystaryna da qarjy bólindi», - dedi ministr.
Osy oraid ol týrizm infraqurylymsyz damymaitynyn atap ótti. Sondyqtan bólingen qarajat 573,7 shaqyrym avtojoldy, 321,4 shaqyrym sý tartý / káriz jelisin, 291,3 shaqyrym sýmen jabdyqtaýdy, 108,6 shaqyrym elektr energiiasyn berý jelilerin jáne basqa da jobalardy jol-kóliktik ári injenerlik infraqurylym turǵysynan damytýǵa múmkindik beredi.
