Elimizde azamattardy turǵylyqty jeri boiynsha tirkeýde jańa pilottyq joba iske qosyldy. Bul týraly QR Ishki ister ministrliginiń ókili Shuǵyla Turlybek málim etti, dep habarlaidy QazAqparat.
«Memleket basshysynyń tapsyrmasyna sáikes politsiia qyzmetin tsifrlandyrý sheńberinde biyl sáýirden bastap «Halyk Homebank» mobildi qosymshasy arqyly azamattardy turǵylyqty jeri boiynsha tirkeýdiń pilottyq jobasy iske qosyldy. Bul jańashyldyq qazaqstandyqtarǵa 5 minýttyń ishinde turǵylyqty jeri jáne ýaqytsha turatyn jeri boiynsha tirkelýge múmkindik beredi», - dedi Shuǵyla Turlybek ministrlikte onlain ótken baspasóz máslihatynda.
Sondai-aq, IIM ókili atalǵan jańashyldyqty qoldanýdyń jolyn aityp berdi.
«Smartfonyńyzǵa «Halyk Homebank» mobildi qosymshasyn júktep, «Memlekettik qyzmetter» bóliminde – «Halyqty turǵylyqty jeri boiynsha tirkeý» tarmaǵyn tańdap, tirkeý túrine, tirkeý merzimine, qyzmet alýshynyń mártebesine bailanysty joldardy toltyrý jetkilikti. Jalpy, bizdiń ministrlik usynatyn memlekettik qyzmetterdi tsifrlandyrý jáne avtomattandyrý jumysy jalǵasyn tabýda», - deidi ol.
Onyń aitýynsha, búginde ishki ister ministrligi usynatyn 40 memlekettik qyzmettiń 38-i avtomattandyrylǵan.
