Qasym-Jomart Toqaevty qoldaý jónindegi halyqtyq koalitsiia qurylady. Bul týraly AMANAT partiiasynyń tóraǵasy – Parlament Májilisiniń spikeri Erlan Qoshanov aitty, dep habarlaidy QazAqparat.
«Ózderińizge belgili, bizden basqa da birqatar partiialar men saiasi birlestikter prezidenttikke Memleket basshysy Qasym-Jomart Kemeluly Toqaevtyń kandidatýrasyn usynyp otyr. Osy oraida biz sol saiasi uiymdarmen birlesip, Qasym-Jomart Kemeluly Toqaevty qoldaý jónindegi halyqtyq koalitsiia qurý jóninde kelisimge keldik», - dedi ol partiianyń kezekten tys XXIV sezinde.
Erlan Qoshanov búgin Prezident Toqaevtyń qatysýymen forým ótetinin aitty.
«Tústen keiin osy ǵimaratta Memleket basshysynyń qatysýymen úlken forým ótedi. Soǵan bárimiz qatysamyz. Barshańyzdy Ádiletti Qazaqstan qurý jolyndaǵy igi bastamalardy iske asyrý úshin judyryqtai jumylýǵa shaqyramyn», - dedi partiia tóraǵasy.
Eske salaiyq, búgin AMANAT partiiasy Qasym-Jomart Toqaevty prezidenttikke kandidat retinde usyný sheshimin qabyldaǵan bolatyn. Sondai-aq búgin «Qazaqstan Halyq partiiasynyń» kezekten tys sezi ótip, delegattar aldaǵy sailaýǵa Qasym-Jomart Toqaevtyń kandidatýrasyn qoldady.
Buǵan deiin Toqaevtyń kandidatýrasyn prezidenttikke máslihattar depýtattarynan quralǵan respýblikalyq qoǵamdyq birlestigi, «Qazaqstan sportshylar odaǵy» respýblikalyq qoǵamdyq birlestigi, Qazaqstannyń Azamattyq aliansy, «Ardagerler uiymy» respýblikalyq qoǵamdyq birlestigi, «Qazaqstan Team» qoǵamdyq birlestigi, Ulttyq volonterlik jelisi usynǵan edi.
