BUU Qaýipsizdik keńesiniń embargosyn buzǵan áýe kompaniialarynyń tizimi jariialandy, dep habarlaidy "Ult aqparat" Azamattyq aviatsiia komitetine silteme jasap.
Biylǵy aqpan aiynda BUU Qaýipsizdik keńesi Qazaqstanda tirkelgen áýe kemelerimen Liviiaǵa qarý jetkizý embargosyna qatysty BUU Qaýipsizdik keńesi sanktsiialarynyń buzylýy boiynsha hat joldady.
«Qazaqstan Respýblikasynyń Indýstriia jáne infraqurylymdyq damý ministrligi quqyq qorǵaý organdarymen birlesip, BUU QK embargosyn buzǵan Qazaqstanda tirkelgen úsh áýe kompaniiasymen jumys júrgizdi. Olar - «Azee Air» JShS, «Sigma Airlines» JShS jáne «Jenis Air» JShS. Osy paidalanýshylardyń áýe kemeleriniń menshik ieleri - Birikken Arab Ámirlikterinde («AGANYA LTD») jáne Britandyq Virgin araldarynda («Infinitive Seal Inc.») tirkelgen sheteldik kompaniialar. Atalǵan paidalanýshylardyń áýe kemeleri Taiaý Shyǵys aimaǵynda sheteldik tapsyrys berýshilerdiń múddesi úshin paidalanylǵan. Áýe kemeleriniń negizgi bazasy - Birikken Arab Ámirlikteri» dep habarlady komitetten.
BUU Qaýipsizdik keńesiniń sanktsiiasy bar elderge reister úshinshi elderdiń aýmaǵynan júzege asyryldy. Halyqaralyq praktikaǵa sáikes, shetelde qalyptasqan tasymaldanatyn júktiń sipatyn paidalanýshy memleket, iaǵni Qazaqstan tarapy baqylamaidy, kerisinshe ushýdy júzege asyratyn shet memleketterdiń memlekettik organdary baqylaidy.
«Qazaqstan Respýblikasy zańnamasynyń, IKAO standarttary men usynylatyn praktikasynyń talaptaryn saqtaý turǵysynan tekserý nátijeleri boiynsha Qazaqstan aviatsiia ákimshiligi bas direktorynyń 2020 jylǵy 29 mamyrdaǵy №167/1 buiryǵyna sáikes, azamattyq áýe kemeleriniń atalǵan úsh áýe kompaniianyń paidalanýshysy sertifikatyn, onyń ishinde «Sigma Airlines» JShS paidalanýshy sertifikatynyń qoldanýy ýaqytsha toqtatyldy. Qazaqstan Respýblikasynyń Syrtqy ister ministrligi 2020 jylǵy 5 maýsymda BUU Qaýipsizdik keńesiniń Liviia jónindegi komitetiniń jetkizilimge embargosynyń buzylýyna qatysty baiandamasyn usyndy. BUU Qaýipsizdik keńesiniń baiandamasynda tergeý barysyndaǵy qazaqstandyq bilik pen Qazaqstannyń aviatsiia ákimshiliginiń ashyqtyǵy men yntymaqtastyǵy úshin BUU sarapshylar tobynyń alǵysy atap ótildi» delingen habarlamada.
Elimizdiń imidjin qaqtyǵys aimaqtaryna nemese BUU Qaýipsizdik keńesiniń sanktsiiasyndaǵy elderge qarý-jaraq pen áskeri tehnika jetkizýdiń «ashyq emes shemalaryna» tartylǵan josyqsyz sheteldik áýe kompaniialardyń áreketterinen saqtaý maqsatynda júk tasymaldaýǵa jáne olardy keiinnen baqylaýǵa arnalǵan áýe kemelerin tirkeý úshin qosymsha sharttar ázirlendi, olar Qazaqstan Respýblikasynyń áýe keńistigin paidalaný jáne aviatsiia qyzmeti týraly QR zańyna ózgerister engizý týraly zań jobasyna engizildi.
Atalǵan normalar 2020 jyldyń sońyna deiin Ekonomikalyq ósýdi qalpyna keltirý máseleleri boiynsha keibir zańnamalyq aktilerge ózgerister men tolyqtyrýlar engizý týraly zań jobasynyń aiasynda qabyldanady dep kútilýde.
Osy baǵyttaǵy jumystar jalǵasyp jatyr.
