Respýblika boiynsha bir jyldyń ishinde 33,4 mln teńge bolatyn jalǵan aqsha anyqtaldy. Onyń ishinde ulttyq jáne sheteldik valiýtalar bar, dep xabarlaidy QazAqparat tilshisi.
Memlekettik kirister komitetiniń Profilaktikalyq jumys jáne baqylaý basqarmasy basshysy orynbasarynyń mindetin atqarýshy Erden Jumanyń aitýynsha, búginde qylmyskerler kóp jaǵdaida eski nominaldaǵy 2 000 teńgeni jasaidy. «Sebebi ol kýpiýranyń qorǵanys elementteri eskirgen. Al 5 000, 10 000, 20 000 teńgelikterdi qoldan jasaý qiyn. Sosyn kýpiýranyń somasy úlken bolsa, ony jiti tekseredi. Bárimiz solai isteimiz. Máselen, dúkende 10 000 teńgeni bersek, satýshylar birden teksere bastaidy. Al 2 000 teńgeni olai teksermeidi. Qylmyskerler osyny jaqsy biledi. Sodan keiin usaq aqshany jasaýǵa tyrysady», - dedi E.Juma búgin Astanada ótken baspasóz máslixatynda.
Onyń sózine qaraǵanda, qylmyskerler, kóbinise, ulttyq valiýtany jasaidy. Sebebi ony takside, dúkende, bazarda jáne taǵy basqa jerderde bere salǵan jeńil. Al sheteldik valiýtany aiyrbastaý qajet. Ondai aqshany aiyrbastaý beketterinde arnaiy qurylǵylarmen tekseredi.
Aita keteiik, ótken jyly Qazaqstanda jalǵan aqsha jasaý boiynsha 214 qylmys tirkeldi. Sonyń ishinde 2 511 dana ulttyq valiýta, onyń jalpy somasy 7,4 mln teńgeni qurady. Al sheteldik valiýtanyń 497 jalǵan kýpiýrasy anyqtaldy. Ol aqshanyń somasy 26 mln teńgeden asty.
