Qazaqstanda qazirgi tańda táýligine 1 mln maska óndirilýde. Alaida onyń ishinde sertifikattalǵan meditsinalyq maskanyń úlesi – 300 myń. «SK-Farmatsiia» JShS basqarma tóraǵasy Berik Shárip osyndai málimetti jariia etti, dep habarlaidy QazAqparat.
«Buryn Qazaqstanda meditsinalyq maskaǵa degen qajettilik - jylyna 30 mln bolsa, qazir bul suranys birneshe ese óskenin túsingen abzal. Biz jyl saiyn shamamen 15 mln maska satyp alyp kelgenbiz. Al biyl 19,7 mln maskanyń kelisimine qol qoiyldy. Onyń ishinde 9 millionyn aimaqtarǵa joldap, sondaǵy meditsinalyq uiymdarǵa tarattyq. Maskanyń da túr-túri bar: úsh nemese tórt qabatty bolýy yqtimal. Biz maskany kepildendirilgen tegin meditsinalyq kómektiń kólemi boiynsha jetkizemiz. Buryn meditsinalyq preparattarǵa suranys kóp bolmaǵanymen, búgingi kúni kúrt artqan. Qazaqstanda táýligine 1 mln maska shyǵarylyp jatyr. Alaida onyń ishinde sertifikattalǵan, taza meditsinalyq maska sany – 300 myń ǵana. 300 myń maska – josparly ári boljamdy qýattylyq bolatyn», - dedi Berik Shárip Sybailas jemqorlyqqa qarsy is-qimyl agenttiginiń Facebook paraqshasynda ótken jiynda.
Buryn Qazaqstan orta eseppen maskany shetten 18 teńgege satyp alyp kelse, qazir halyqaralyq naryqta onyń baǵasy shamamen 150 teńgege deiin qymbattaǵan.
«Bizge nelikten maska nege 118 teńge turady degen ýáj jii aitylady. Biz ony 106,9 teńgege satyp aldyq. Ol kezde logistika da toqtap qalǵan edi. Shuǵyl kerektigin eskerip, aldyrdyq. Álbette, munyń bári túpki baǵaǵa áser etpei qoimaidy», - dedi Berik Shárip.
