Qazaqstanda táýelsizdik jyldary 154 mln sharshy metr turǵyn úi salyndy. Bul týraly Indýstriia jáne infraqurylymdyq damý ministrliginen málim boldy, dep habarlaidy "Ult aqparat".
«El táýelsizdigin alǵannan bastap (1991-2019 jyldar) barlyǵy 154,4 mln sharshy metr jańa turǵyn úi salyndy. 1,4 mln-nan astam azamattyń turǵyn úi jaǵdaiy jaqsartyldy. Turǵyn úi baǵdarlamasy aiasynda turǵyn úidi paidalanýǵa berý tarihy týraly tolyǵyraq aita ketsek. 2004 jyldan bastap orta klass pen halyqtyń áleýmettik qorǵalatyn toptary úshin turǵyn úi salýdy yntalandyrý jóninde sharalar qabyldaýǵa baǵyttalǵan 2005-2007 jyldarǵa arnalǵan turǵyn úi qurylysynyń birinshi baǵdarlamasy ázirlendi. Iaǵni, bul kommýnaldyq turǵyn úi jáne qoljetimdi turǵyn úi qurylysy balalary bar jas otbasylar, memlekettik organdar men mekemelerdiń qyzmetkerleri, memlekettik kásiporyndar, áleýmettik sala qyzmetkerlerine arnaldy. 2005-2007 jyldary qarjylandyrýdyń barlyq kózderi boiynsha turǵyn úi qurylysyna 1113 mlrd teńge investitsiia baǵyttaldy. Jospar boiynsha 15,8 mln sharshy metr salynýy kerek bolsa, is júzinde 17,9 mln sharshy metr turǵyn úi paidalanýǵa berildi», - delingen QR IIDM baspasóz qyzmetiniń málimetinde.
Osy baǵdarlama aiaqtalǵannan keiin, turǵyn úi qurylysy saiasaty 2008-2010 jyldarǵa arnalǵan turǵyn úi qurylysynyń baǵdarlamasy aiasynda jalǵastyryldy. Atalǵan kezeń qorytyndysy boiynsha 19,7 mln sharshy metr turǵyn úi paidalanýǵa berildi.
Turǵyn úi qurylysynyń kólemin saqtaý, jeke investitsiialardy tartýdy yntalandyrý, turǵyn úi qurylys júiesiniń áleýetin neǵurlym keńinen paidalaný úshin, sondai-aq basqa da mindetterdi sheshý úshin 2011 jylǵy 31 naýryzda Turǵyn úi qurylysynyń 2011-2014 jyldarǵa arnalǵan baǵdarlamasy bekitildi. Osylaisha, tek 2011 jyly 6,5 mln sharshy metr turǵyn úi salyndy.
2012 jyly 7 mindetti sheshýge baǵyttalǵan «Qoljetimdi turǵyn úi – 2020» uzaq merzimdi baǵdarlamalyq qujaty ázirlendi. Máselen, 2012-2014 jyldary josparda 19,5 mln sharshy metr bolsa, is júzinde 21 mln sharshy metr turǵyn úi paidalanýǵa berildi.
Sodan keiin, Prezidenttiń 2012 jylǵy 14 jeltoqsandaǵy Joldaýy aiasynda óńirlerdiń áleýmettik-ekonomikalyq áleýetin damytý úshin jaǵdai jasaýǵa, ekonomikalyq ósý ortalyqtarynda halyq pen kapitaldy shoǵyrlandyrýdy yntalandyrýǵa baǵyttalǵan «Óńirlerdi damytýdyń 2020 jylǵa deiingi baǵdarlamasy» bekitildi. 2013-2015 jyldary investitsiia kólemi 497,8 mlrd teńgeden 740 mlrd teńgege deiin ósti. Bul turǵyn úi qoryn elimizde 340,6 mln sharshy metrge deiin ulǵaita otyryp, 24 mln sharshy metr jańa turǵyn úidi iske qosýdy qamtamasyz etti.
Daǵdarysqa qarsy mindetterdi iske asyrý maqsatynda 2015-2019 jyldarǵa arnalǵan «Nurly jol» infraqurylymdyq damý memlekettik baǵdarlamasy ázirlenip, bekitildi. Onda Ulttyq qor qarajatynan turǵyn úidiń qoljetimdiligin arttyrý jónindegi mindetter aiasynda turǵyn úi jáne infraqurylym qurylysyn qarjylandyrý kózdelgen. 2015-2016 jyldary 19,4 mln sharshy metr turǵyn úi paidalanýǵa berildi.
Memleket basshysynyń tapsyrmasy boiynsha turǵyn úi qurylysy salasyndaǵy barlyq resýrstardy bir baǵdarlamada shoǵyrlandyrý maqsatynda 2017-2019 jyldarǵa arnalǵan «Nurly jer» infraqurylymdyq damý memlekettik baǵdarlamasy iske asyryldy. 2017-2018 jyldary 36,8 mln sharshy metr jańa turǵyn úi salyndy. Shamamen 333 myń azamattyń turǵyn úi jaǵdaiy jaqsartyldy.
