Búgin Qazaqstan boiynsha 2018 jylǵy Memlekettik bilim granty iegerleriniń tolyq tizimi jariialandy. Sonymen qatar, Qazaqstan azamattary bolyp tabylmaityn, ulty qazaq azamattar úshin bólingen kvotamen túsken bilim berý granty iegerleriniń de tizimi belgili boldy, dep habarlaidy "Ult aqparat".
Jalpy, biylǵy jańa oqý jylynda granttardy sheteldegi qazaq ultynyń 862 ókili ielendi.
Atap aitqanda, olardyń arasynda basym bóligi, iaǵni 290 adam bilim berý mamandyqtaryn, 242-si tehnikalyq ǵylymdar jáne tehnologiialar salasyn tańdaǵan.
Sonymen, etnikalyq qazaq jastaryna arnalǵan bul baǵyt boiynsha eń tómengi 25 balmen «Dene shynyqtyrý jáne sport» mamandyǵyna grantqa ótken talapker bar. Budan bólek, 26 ball jinaǵan taǵy bir talapker «Dene shynyqtyrý jáne sport» mamandyǵyna, sondai-aq osyndai kólemdegi upaimen bir talapker «Mektepke deiingi oqytý jáne tárbieleý» mamandyǵyna grantqa ótti.
Budan bólek, bul tizimde eń joǵary 133 ball jinaǵan bir qandasymyz «Tasymaldaýdy, qozǵalysty uiymdastyrý jҽne kólikti paidalaný» mamandyǵyna, sonymen qatar 133 ball alǵan ekinshisi «Jalpy meditsina» baǵytynda grantty ielendi.
Eske sala ketsek, biyl UBT 167 pýnktte ótkizildi. Sonyń ishinde kolledjder bazasynda - 3, joǵary oqý oryndary bazasynda - 48, mektepter bazasynda - 116 pýnkt boldy.
Biyl UBT tapsyrýǵa 102447 ótinish berildi. Sonyń 77224-i qazaq tilinde, 25177-si orys, al 46-sy aǵylshyn tilinde tapsyrý nietin bildirgen. Is júzinde biyl 98698 bitirýshi UBT tapsyrdy, byltyr bul kórsetkish 88583 bolatyn.
Eske salaiyq, búgin, 6 tamyzda biylǵy bilim granty iegerleriniń tolyq tizimi jariialanǵan bolatyn.
