Qazaqstanda suiytylǵan gaz óndiretin 3 zaýyt salynady. Bul týraly Úkimet otyrysynda QR Energetika ministri Maǵzum Myrzaǵaliev aitty, dep habarlaidy QazAqparat.
«Suiytylǵan gaz óndirýdi arttyrý maqsatynda 3 jobany iske asyrý josparlanyp otyr. Birinshi joba – Aqtaý qalasynda tómen qýatty gaz óńdeý zaýyty. Onyń qýaty jylyna 60 myń tonnany, al investitsiialar kólemi 1,5 mlrd teńgeni quraityn bolady. Jobanyń aiaqtalýy osy jyldyń sońyna josparlanǵan. Ekinshi joba - Jańaózen qalasynda jumys istep turǵan Qazaq gaz óńdeý zaýytynyń ornyna jańa gaz óńdeý zaýytyn salý. Onyń qýaty 900 mln tekshe metrdi quraidy dep josparlanýda. Jobanyń quny – 147 mlrd teńge. Qurylystyń aiaqtalý merzimi - 2023 jyl», - dedi óńdeý ónerkásibin damytý týraly baiandaǵan ministr.
Onyń atap ótýinshe, atalǵan zaýyt shamamen 760 mln tekshe metr taýarlyq gaz, 232 myń tonna suiytylǵan munai gazyn jáne 82 myń tonna kóleminde pentan-geksan fraktsiiasyn óndiretin bolady.
«Úshinshi jobaǵa keletin bolsaq, osy jyly Qashaǵan ken ornynda qýaty 1 mlrd tekshe metrdi quraityn gaz óńdeý zaýytynyń qurylysy bastaldy. Jobanyń quny 380,8 mlrd teńgege teń. Qurylystyń josparlanǵan aiaqtalý merzimi - 2023 jyl», - dedi ol.
Maǵzum Myrzaǵalievtiń aitýynsha, zaýyt 800 mln tekshe metr taýarlyq gazy, 119 myń tonna suiytylǵan gaz, 35 myń tonna kondensat jáne 212 myń tonna kúkirt óndiredi.
«Atalǵan jobalardy iske asyrýdyń arqasynda 2025 jylǵa qarai suiytylǵan gaz óndirisiniń kólemi 300 myń tonnaǵa artyp, 3,5 mln tonnany quraityn bolady. Al tartylatyn investitsiialardyń kólemi 530 mlrd teńge bolady dep josparlanýda», - dedi ministr.
