QR Joǵarǵy sotynyń baspasóz hatshysy Aidos Sádýaqasov aýdandyq, oblystyq jáne Joǵarǵy sot sýdialary qansha jalaqy alatyndyǵyn aitty, dep habarlaidy "Ult aqparat".
«Qazaqstanda aýdandyq, oblystyq jáne Joǵarǵy sotty qosa alǵanda 2 684 sýdialyq birlik qarastyrylǵan. Biraq, qazirgi tańda 2 400-i naqty jumys isteidi. 14 paiyz bos oryn bar», - dedi ol búgin Ortalyq kommýnikatsiialar qyzmetindegi baspasóz máslihatynda.
Sonymen qatar ol aýdandyq jáne oblystyq sýdialardyń jalaqylary qansha ekendigin de atap ótti.
«Jalaqylaryna qatysty eshqandai qupiia joq. Jalpy, eńbekaqy aýdandyq deńgeidegi sýdialarda ortasha eseppen alǵanda 400-500 myń teńgeniń tóńireginde. Ol - jumys ótiline bailanysty. Al oblystyq deńgeide - 600-700 myń, Joǵarǵy sotta 800-900 myń teńgeniń tóńireginde bolyp otyr. Sýdialardyń eńbek ótiline bailanysty jalaqylarynda aiyrmashylyq bolýy múmkin», dedi Aidos Sádýaqasov.
