Sý tasqyny kezeńi bastalǵaly 1,5 myńnan astam adam evakýatsiialandy. Bul týraly Senattyń jalpy otyrysynda QR Tótenshe jaǵdailar ministri Iýrii Ilin málim etti, dep habarlaidy QazAqparat.
«Sý tasqyny kezeńiniń basynan beri respýblika boiynsha 11 eldi mekende 192 turǵyn úidi (BQO - 140, Aqtóbe - 41, Pavlodar - 3, ShQO - 6, Qaraǵandy - 2) jáne 78 saiajaidy (Aqtóbe-78), sondai-aq 3 áleýmettik nysandy erigen qar sýy basty. Sýdy burý jumystary tolyǵymen aiaqtaldy. Aýqymdy sý tasqynyna qaramastan, sý basý saldaryn joiý jáne halyqty qulaqtandyrý sharalary ýaqytyly júrgizildi, adam qurbandaryna jol berilmedi. Barlyǵy 1 595 adam evakýatsiialandy (BQO - 912, Aqtóbe - 520, Pavlodar - 10, Qaraǵandy - 117, ShQO - 36), olardyń 15-i ýaqytsha evakýatsiialaý pýnktterinde ornalasqan (BQO), 1 580-i úilerine oraldy», - dedi Iu. Ilin.
Onyń aitýynsha, oblystyq jáne jergilikti mańyzy bar joldardyń 20 ýchaskesinde sý tasqyny jalǵasýda, 6 ýchaske jáne jergilikti mańyzy bar 3 kópir shaiylyp ketken.
«Sý tasqyny kezeńi jalǵasýda. 2022 jylǵy sý tasqyny kezeńiniń ótý qorytyndysy boiynsha ministrlik tiisti qorytyndylarmen jáne usynystarmen óńirlerde tótenshe jaǵdailardyń týyndaýyna yqpal etken sebepter men jaǵdailarǵa egjei-tegjeili taldaý júrgizetin bolady», - dedi ministr.
