Biyl Qytaimen sý máselesine qatysty birlesken komissiianyń josparlanǵan otyrysy ótedi. Bul týraly Ekologiia, geologiia jáne tabiǵi resýrstar ministrliginiń alqa májilisinde osy vedomstvonyń vitse-ministri Serik Qojaniiazov málim etti, dep habarlaidy QazAqparat.
«Ǵalymdardyń boljamy boiynsha Qazaqstanda 2040 jyldarǵa qarai sý tapshylyǵy 50 paiyzǵa jetýi múmkin. Elimizdegi sý resýrstarynyń jartysyna jýyǵy ózge memleketterdiń aýmaǵynda qalyptasatynyn eskere otyryp, kórshiles memlekettermen áriptestikke erekshe kóńil bólý qajet. Ótken jyly Qytaidan basqa kórshiles elder arasynda sý máselesine qatysty birlesken komissiialarynyń josparlanǵan otyrystary túgel ótti. Pandemiiaǵa bailanysty Qytai tarapy komissiia otyrysyn 2021 jyly birinshi toqsanda ótkizýdi surady», - dedi S. Qojaniiazov.
Onyń aitýynsha, vegetatsiialyq maýsymda sýdyń tapshylyǵyn sheshý maqsatynda qyrǵyz tarapymen elektr energiiasymen almasý jóninde ýaǵdalastyqqa qol jetkizildi. Nátijesinde, «Toqtaǵul» sý qoimasynan 330 mln tekshe metr sýarmaly sýdy qosymsha ótkizý qamtamasyz etildi. Osy tártip boiynsha Tájikstan aýmaǵynan 300 mln tekshe metr sý jiberildi.
Condai-aq, jańa Sý kodeksiniń tujyrymdamasy osy jyldyń sońyna deiin bekitiledi.
«Aldymyzda turǵan aýqymdy jumys sý salasyndaǵy zańnamany jetildirýge qatysty. Qoldanystaǵy Sý kodeksi 2003 jyly qabyldanǵan. Osyǵan taldaý jasadyq, sodan beri kodeks 63 paiyzǵa deiin ózgertýler men tolyqtyrýǵa ushyraǵan», - dedi Qojaniiazov.
Onyń aitýynsha, qoldanystaǵy kodeks sýdy sharýashylyq maqsatynda paidalanýǵa baǵyttalǵan.
«Jańa Sý kodeksi eldiń sý resýrstary áleýetin saqtaý, sýǵa degen suranysty basqarý baǵyttaryn kúsheitýi tiis. Jańa qujattyń tujyrymdamasy osy jyldyń sońyna deiin ázirlenedi», - dedi vitse-ministr.
Budan buryn habarlanǵandai, 2020 jyly 1 022 ekologiialyq tekserý júrgizildi. Tekserister sanynyń azaiýy eldegi karantinge bailanysty. Tekserý nátijeleri boiynsha 2 875 zań buzýshylyq anyqtaldy. Olardy joiý týraly 1 966 nusqama berilip, sonyń 1 540-y oryndaldy.
