Qazaqstanda Bilim jáne ǵylym ministrligi janynan stýdenttik keńes qurylady, dep habarlaidy "Ult aqparat".
Bul jaiynda QR Bilim jáne ǵylym ministri Ashat Aimaǵambetov aitty.
«Jaqynda stýdenttik uiymdardyń jetekshilerimen, stýdenttik parlament ókilderimen, kolledjder men joǵary oqý oryndaryndaǵy Jastar isi jónindegi komitet tóraǵalarymen kezdesý ótkizdim. Jiyn barysynda qashyqtan bilim berý, oqý oryndarynyń litsenziialaryn qaitaryp alý jáne ýniversitetterdiń jabylýy, túlekterdiń jumysqa ornalasýy, bilim sapasyn arttyrý, stýdenttik ózin-ózi basqarýdy qoldaý máselelerine qatysty áńgime órbidi. Stýdenttik shaǵymda «Chto? Gde? Kogda?» jobasynyń chempionattaryna, debat jarystaryna qatysatynbyz. Qazir jaqyn aralasatyn dostarymnyń kóbimen sol kezeńde, pikirsaiys alańdarynda tanystyq. Biz birigip, problemalyq máselelerdi ýniversitet basshylyǵy deńgeiinde kóterýden taisalmaitynbyz. Men bilim alǵan joǵary oqý ornynynyń rektory – marqum Jambyl Sáýlebekuly Aqylbaevtyń stýdentterge degen qoldaýy erekshe bolatyn. Belsendi jastardyń usynystaryn nazardan tys qaldyrmai, bilim alýshylar úshin barlyq qolaily jaǵdaidy jasaityn. Ýniversitet basshylyǵy tarapynan ár stýdent úshin qolaily jaǵdaidy qamtamasyz etý – jastardyń talantyn ashýǵa, alǵa jeteleýge, baǵdar berýge baǵyttalǵan jáne úlken jetistikter jolynda jasalǵan alǵashqy mańyzdy qadam. Sondyqtan JOO basshylary úshin osy máseleler basty nazarda bolýy tiis» dep jazdy ministr Facebook paraqshasynda.
Onyń aitýynsha, stýdenttermen kezdesý barysynda biraz jospar qurylǵan.
«Birinshiden, jaqyn arada QR BǴM janynan Stýdenttik Keńes qurylady. Onyń quramyna qazaqstandyq joǵary oqý oryndarynyń belsendileri kiredi. Olarmen stýdentter men JOO-larǵa qatysty barlyq ózekti máselelerdi talqylaimyz. Keńes barlyq stýdenttik uiymdardyń jumysyn úilestirýmen ainalysady. Ekinshiden, kezdesýge qatysýshylar tarapynan Jastar isi jónindegi komitetterdiń arnaiy qurylymdyq bólimsheleriniń jumys isteýine qatysty usynys jasaldy. Mundai bólimsheler stýdenttik ómirdi sapaly uiymdastyryp, jas talanttardyń tynysyn ashý barysynda taptyrmas qural bola alady. Osy jumysty júielendiremiz. Úshinshiden, árbir joǵary oqý ornynda stýdenttik ózin-ózi basqarý organy jumys isteýi máselesi. Mysaly, Stýdenttik Parlament. Bilim alýshylar kóshbasshylaryn ózderi daýys berip sailaýy qajet. Bul olardyń quqyqtyq jáne saiasi turǵydaǵy mádenietin arttyrýǵa kómektesedi. Stýdentke ortalyqtandyrylǵan oqytý tujyrymdamasy aiasynda stýdenttik ózin-ózi basqarý organdary bilim alýshylardyń máselelerin sheshýge tikelei qatysýy kerek. Uiym tóraǵalary óz kezeginde joǵary oqý ornyndaǵy direktorlar keńesiniń jumysyna qatysý quqyǵyn ielenip, stýdentterge qatysty qabyldanatyn sheshimderdiń sapasyn arttyrýǵa bilim alýshylar tarapynan yqpal etýi tiis. Tórtinshiden, stýdenttik volonterlik uiymdardy belsendi damytý qajet. Bul mehanizm búginde biz qalaǵandai tiimdi jumys istemeidi. Biz kóptegen bastamalar bar ekenin bilemiz, alaida olardy júzege asyrý úshin stýdentterdiń tájiribesi jetispei, basqa da jaǵdailar oryn alyp jatady» dep atap ótti Ashat Aimaǵambetov.
Ministrdiń sózine sensek, bul iske myqty volonterlik uiymdar qoldaý kórsete alady.
«Sondai-aq 2021 jyldan bastap joǵary oqý oryndarynyń jeke úlgidegi diplom berýi, túlekterdi sertifikattaý, akademiialyq adaldyq qaǵidalaryn saqtaý jáne sybailas jemqorlyqqa degen tózbeýshilik máselelerin muqiiat talqyladyq. Mundai kezdesýlerdi QR BǴM janynan qurylatyn Stýdenttik keńes qyzmeti sheńberinde júieli túrde jalǵastyramyz» dep túiindedi ministr.
