Qazaqstanda buqaralyq jáne kásibi sportty damytýdyń jańa jospary qabyldanady. Bul týraly QR Mádeniet jáne sport ministri Dáýren Abaev málim etti, dep habarlaidy QazAqparat.
«Sport sektsiialarynan bastap olimpiadalyq rezervti qalyptastyrýǵa deiingi barlyq deńgeidegi sportshylardy daiarlaý júiesinde keshendi úlken ózgerister qajet. Búgingi tańda bizdiń aldymyzda úlken mindet tur. Ol degenimiz infraqurylymdy damytý, jarystar men daiyndyq jiyndarynyń kúntizbesin júieleý, kásibi jáne buqaralyq sportty qarjylandyrýda teńgerim ornatý. Sonymen qatar barlyq deńgeidegi sport mektepterin jasaqtaýdy, tóreshilerdi, jattyqtyrýshylardy, sport dárigerlerin jáne taǵy basqalardy qosa alǵanda, sportty damytýdyń baǵdarlamalyq paiymyn qalyptastyrý. Osy oraida sportty damytý baǵdarlamasyn ázirlep, Prezidentpen kelisip, ony iske asyrýǵa kirisemiz. Oǵan qosa sportshylardy kelesi «Parij-2024» jáne «Milan-2026» olimpiada oiyndaryna daiyndaýdyń eki qosalqy baǵdarlamasy bar», - dedi Dáýren Abaev.
Sondai-aq, ministr sportty damytý sharasyna tikelei ózi jaýap beretinin aitty.
«Ministrlik olardy iske asyrý úshin tolyq jaýapkershilikti óz moinyna alýǵa daiyn. Sportty damytýdyń baǵdarlamalyq kózqarasyn daiyndaýdaǵy alǵashqy qadam - sportshylardy daiarlaýdyń búkil júiesiniń jai-kúiin táýelsiz keshendi tekserý bolýǵa tiis. Jaýapty vitse-ministrden ony uiymdastyrý jóninde usynystar daiyndaýdy suraimyn», - deidi ol.
Aita ketsek, Shýchinskide Beijińde ótken XXIV qysqy olimpiada oiyndarynyń qorytyndysyna arnalǵan keńeitilgen otyrys ótip jatyr.
