Qazaqstanda sheteldik internet-dúkenderge arnaiy salyq salynýy múmkin. Mundai jospardyń bary týraly Saýda jáne integratsiia ministrliginiń alqa otyrysynda «Atameken» ulttyq kásipkerler palatasy basqarma tóraǵasynyń orynbasary Nariman Ábilshaiyqov aityp berdi, dep habarlaidy QazAqparat.
«Birinshiden, elektrondyq kommertsiiadaǵy tutynýshylardyń quqyǵyn qorǵaý boiynsha normativtik sharalardy odan ary kúsheitý kózdelgen. Taýarlardy qaitarýǵa, kórsetiletin qyzmetterdiń sapasy men tutynýshylardyń daý-sharyn sheshýge bailanysty problemalar áli de bar», - dedi Nariman Ábilshaiyqov.
Bul baǵytta ekinshi jospar – saýdany barynsha zańdy sheńberge, áleýmettik jelige ákelip, kóleńkeden shyǵarý bolyp otyr.
«Búgingi kúni áleýmettik jeliler arqyly satylatyn taýarlar kólemi jaily málimet joqtyń qasy. Bul naryq zań talaptary saqtalmaǵan «sur aimaqqa» jatady. Resmi júktemeden qutylǵan beiresmi sektordyń shaǵyn sýbektileri negizsiz básekelik artyqshylyqtarǵa ie bolyp keledi», - dep atap ótti spiker.
Onyń aitýynsha úshinshi jospar – elektrondy saýdadaǵy qazaqstandyq operatorlardy qoldaý maqsatynda zańnamalyq turǵyda otandyq jáne sheteldik internet-dúkenderdiń tepe-teńdigine qol jetkizý josparlanǵan.
«Salyq tólemderin júrgizbegendikten, sheteldik saýdagerler otandyq saýda alańdarynyń aldynda baǵa jaǵynan basymdyqqa ie bolyp keledi», - dedi Nariman Ábilshaiyqov.
