Karantindik shekteýler kezinde memlekettik shekarany kesip ótý tártibine ózgerister engizildi, dep habarlaidy "Ult aqparat" QR Ulttyq qaýipsizdik komitetine silteme jasap.
«Qazaqstan Respýblikasy Úkimetiniń sheshimimen QR azamattaryna tikelei áýe qatynasy qaita ornatylǵan shet memleketterge shyǵýǵa jáne atalǵan elderdiń azamattaryna Qazaqstan Respýblikasyna kirýge ruqsat beriledi. Sheteldikter úshin negizgi shart – vizalyq talaptardy saqtaý, Qazaqstan Respýblikasyna tikelei áýe qatynasy qaita ornatylǵan memleketterdiń azamaty bolýy jáne osy memleketten tikelei reispen júrýi tiis. Osy tártipke sáikes elge kirýge ruqsat etilgen sheteldikter de QR amaǵyna kirý úshin tikelei áýe reisterin paidalana alady», - delingen QR UQK habarlamasynda.
Budan basqa, Qazaqstan Respýblikasynyń Memlekettik shekarasynan ótýge:
- Qazaqstan Respýblikasyna ekipajdan tys aýysymǵa bara jatqan, teńiz kemeleriniń qyzmetkerleri quramynan turatyn sheteldik azamattarǵa – teńiz (ózen) kemeleriniń qyzmetkerleri quramyna qatysy men mártebesin dáleldeitin tiisti qujattary bolǵan jaǵdaida;
- Qazaqstan Respýblikasynda aýylsharýashylyq qyzmetimen ainalysatyn taýar ielerine - aýylsharýashylyq qyzmetin júzege asyrýdy rastaityn qujattar bolǵan jaǵdaida (Qazaqstan Respýblikasy Aýyl sharýashylyǵy ministrligi bekitken tizim men úlgi qujattaryna sáikes);
- sheteldik oqý oryndarynda oqyp júrgen Qazaqstan Respýblikasynyń kámelet jasqa tolmaǵan azamattaryn ertip júretin ata-analaryna (qorǵanshylary nemese qamqorshylaryna), sondai-aq olardyń stýdenttik vizalaryn uzartý, stýdenttik ID-kartalaryn rásimdeý, emtihan (test) tapsyrý úshin - sheteldik bilim berý mekemesiniń shaqyrýy jáne osy maqsattarmen shet elge kirýge resmi ruqsaty bolǵan jaǵdaida ruqsat etilgen.
Elden shyqqan kezde Qazaqstan Respýblikasynyń azamattary qoldanystaǵy shekteýlerdi jáne sapar josparlanǵan elge kirý múmkindigin óz betinshe anyqtaýy qajet.
